മെൽബൺ: പ്രമുഖ ഓസ്ട്രേലിയൻ അത്ലറ്റിക്സ് താരം ജെമ്മ സ്റ്റാപ്പിൾട്ടൺ (25) അന്തരിച്ചു. കുടുംബത്തോടൊപ്പം വിദേശത്ത് അവധിക്കാലം ആഘോഷിക്കുന്നതിനിടെയാണ് അപ്രതീക്ഷിത വിയോഗം സംഭവിച്ചത്. മരണകാരണം ഔദ്യോഗികമായി വെളിപ്പെടുത്തിയിട്ടില്ലെങ്കിലും, വിദേശത്തുണ്ടായ ഒരു അപകടത്തെത്തുടർന്നാണ് ജെമ്മയ്ക്ക് ജീവൻ നഷ്ടപ്പെട്ടതെന്ന് സഹോദരൻ പങ്കുവെച്ച ഓൺലൈൻ ഫണ്ട് ശേഖരണ പേജിൽ വ്യക്തമാക്കുന്നുണ്ട്. 2025-ലെ പ്രശസ്തമായ ‘സ്റ്റാവെൽ ഗിഫ്റ്റ്’ മത്സരത്തിലെ ഫൈനലിസ്റ്റായിരുന്നു ഈ വിക്ടോറിയൻ സ്പ്രിന്റർ. താരത്തിന്റെ വിയോഗത്തിൽ കുടുംബാംഗങ്ങളും വിവിധ കായിക ക്ലബ്ബുകളും ഉൾപ്പെടെ വലിയൊരു ജനസമൂഹം കടുത്ത ദുഃഖവും ആദരാഞ്ജലികളും രേഖപ്പെടുത്തി.
അപ്രതീക്ഷിതമായുണ്ടായ ഈ വലിയ നഷ്ടത്തിൽ തകർന്നുപോയ സ്റ്റാപ്പിൾട്ടന്റെ കുടുംബത്തെ സാമ്പത്തികമായി സഹായിക്കുന്നതിനും ഒപ്പം നിൽക്കുന്നതിനുമായി സുഹൃത്തുക്കൾ ചേർന്ന് ഒരു ഗോഫണ്ട്മീ പേജ് ആരംഭിച്ചിരുന്നു. വ്യാഴാഴ്ച ആരംഭിച്ച ഈ ഫണ്ട് ശേഖരണം ഇതിനകം തന്നെ ലക്ഷ്യമിട്ട ഒരു ലക്ഷം ഡോളറിലധികം തുക സമാഹരിച്ചു കഴിഞ്ഞു. ഈ ദുരന്തസമയത്ത് കുടുംബത്തിന് സാമ്പത്തിക സമ്മർദ്ദമില്ലാതെ ഒന്നിച്ച് പ്രാർത്ഥിക്കാനും ദുഃഖം പങ്കിടാനും വേണ്ടിയാണ് ഈ തുക ഉപയോഗിക്കുകയെന്ന് വെബ്പേജിൽ കുറിച്ചിട്ടുണ്ട്. വിദേശത്ത് മരണപ്പെട്ട ഓസ്ട്രേലിയൻ പൗരന്റെ കുടുംബത്തിന് ആവശ്യമായ എല്ലാ കോൺസുലർ സഹായങ്ങളും നൽകിവരുന്നതായി ഓസ്ട്രേലിയൻ വിദേശകാര്യ-വ്യാപാര മന്ത്രാലയത്തിന്റെ വക്താവ് സ്ഥിരീകരിച്ചു.
ജെമ്മയുടെ വിയോഗത്തിൽ പങ്കാളി ടൈലർ ഗ്രേയും സഹോദരൻ ജോയലും ഇൻസ്റ്റാഗ്രാമിലൂടെ ഹൃദയഭേദകമായ കുറിപ്പുകൾ പങ്കുവെച്ചു. തന്റെ ജീവിതത്തിൽ സംഭവിച്ച ഏറ്റവും നല്ല കാര്യം ജെമ്മയായിരുന്നുവെന്നും ഈ വേദന വാക്കുകളാൽ വിവരിക്കാൻ കഴിയില്ലെന്നും ടൈലർ കുറിച്ചപ്പോൾ, ജെമ്മ തനിക്ക് ഒരു സഹോദരി മാത്രമല്ല ഏറ്റവും നല്ല കൂട്ടുകാരി കൂടിയായിരുന്നുവെന്നും അവളെ ഓർത്ത് അഭിമാനിക്കാവുന്ന രീതിയിൽ ജീവിക്കുമെന്നും സഹോദരൻ ജോയൽ ഉറപ്പുനൽകി.
ബാല്യകാലത്ത് നോക്സ് ലിറ്റിൽ അത്ലറ്റിക്സിലൂടെയാണ് ജെമ്മ കായികരംഗത്ത് ശ്രദ്ധേയയാകുന്നത്. കഠിനാധ്വാനവും കായികരംഗത്തോടുള്ള സ്നേഹവും വഴി ട്രാക്കിൽ മികച്ച നേട്ടങ്ങൾ കൊയ്യാൻ ജെമ്മയ്ക്ക് സാധിച്ചിട്ടുണ്ടെന്ന് നോക്സ് അത്ലറ്റിക്സ് ഭാരവാഹികൾ അനുസ്മരിച്ചു. ജെമ്മയുടെ സാന്നിധ്യവും സംഭാവനകളും കമ്മ്യൂണിറ്റിയിൽ വലിയ സ്വാധീനം ചെലുത്തിയിട്ടുണ്ടെന്ന് വിക്ടോറിയൻ അത്ലറ്റിക് ലീഗ് തങ്ങളുടെ അനുശോചന സന്ദേശത്തിൽ അറിയിച്ചു. ജെമ്മ മുൻപ് കളിച്ചിരുന്ന റൗവിൽ നെറ്റ്ബോൾ ക്ലബ്ബും, അവളുടെ കുടുംബവുമായി അടുത്ത ബന്ധമുള്ള ലൈസ്റ്റർഫീൽഡ് ജൂനിയർ ഫുട്ബോൾ ക്ലബ്ബും താരത്തിന്റെ അകാല വിയോഗത്തിൽ അഗാധമായ ദുഃഖം രേഖപ്പെടുത്തി.
