വി. രാജേഷ് മോഹൻ റാവു
ധർമ്മടം, തലശ്ശേരി.
ലേഖകൻ കേരള കൊങ്കണി ഭാഷ പ്രവർത്തകസമിതി സംസ്ഥാന ഭാരവാഹിയും, ധർമ്മടം ചന്ദ്രകല മോഹൻ റാവു കൾച്ചറൽ ഫോറം പ്രസിഡന്റുമാണ്
……………………………………………………….
കൊങ്കണി സമൂഹത്തിന്റെ ആത്മീയവും സാംസ്കാരികവുമായ ചരിത്രത്തിൽ അത്യുന്നതമായ സ്ഥാനമുള്ള മഹത് വ്യക്തിത്വമാണ് ശ്രീ കാശീ മഠ സ്ഥാപനത്തിന്റെ ഇരുപതാമത് മഠാധിപതിയായിരുന്ന പരമപൂജ്യ ജഗദ്ഗുരു ശ്രീമദ് സുധീന്ദ്ര തീർഥ സ്വാമികൾ. ഗൗഡ സാരസ്വത ബ്രാഹ്മണ സമൂഹത്തിന്റെ ആദരണീയനായ ആത്മീയഗുരുവും കാശീ മഠത്തിന്റെ ഗുരുപരമ്പരയിലെ പ്രമുഖ ആചാര്യനുമായിരുന്ന അദ്ദേഹം തന്റെ ജീവിതം ആത്മീയതയ്ക്കും ധർമപ്രചാരണത്തിനും വിദ്യാഭ്യാസത്തിനും സാമൂഹികസേവനത്തിനുമായി സമർപ്പിച്ചു. അദ്ദേഹത്തിന്റെ ജന്മശതാബ്ദിയോടനുബന്ധിച്ച് കേന്ദ്ര ധനമന്ത്രാലയം 100 രൂപയുടെ സ്മാരക വെള്ളിനാണയം പുറത്തിറക്കുന്നതിനുള്ള ഔദ്യോഗിക വിജ്ഞാപനം പുറപ്പെടുവിച്ചത് കൊങ്കണി സമൂഹത്തിന് ഏറെ അഭിമാനകരമായ അംഗീകാരമാണ്. ഒരു ആത്മീയാചാര്യന്റെ ജീവിതത്തെയും സമൂഹത്തിനുവേണ്ടിയുള്ള സമഗ്ര സംഭാവനകളെയും ദേശീയതലത്തിൽ ആദരിക്കുന്ന ഈ നടപടി ഏറെ ചരിത്രപ്രാധാന്യമർഹിക്കുന്നു.
1926 മാർച്ച് 31-ന് എറണാകുളത്ത് ശ്രീ രാമദാസ് ഷേണായിയുടെ മകനായി സദാശിവ ഷേണായി എന്ന പേരിലാണ് അദ്ദേഹം ജനിച്ചത്. എറണാകുളം മഹാരാജാസ് കോളേജിൽ പ്രീ യൂണിവേഴ്സിറ്റി വിദ്യാഭ്യാസം പൂർത്തിയാക്കിയ അദ്ദേഹം ചെറുപ്പംമുതൽ ആത്മീയജീവിതത്തോട് പ്രത്യേക താൽപര്യം പ്രകടിപ്പിച്ചിരുന്നു. ശ്രീമദ് സുകൃതീന്ദ്ര തീർഥ സ്വാമികളുടെ ശിഷ്യത്വം സ്വീകരിച്ച അദ്ദേഹം 1944 മെയ് 24-ന് കർണാടകത്തിലെ മുൾക്കിയിൽവെച്ച് സന്യാസദീക്ഷ സ്വീകരിച്ചു. തുടർന്ന് സുധീന്ദ്ര തീർഥ എന്ന സന്യാസനാമം സ്വീകരിച്ചു. സന്യാസജീവിതത്തിന്റെ ആരംഭം മുതൽ ആത്മീയപഠനത്തിനും ഗുരുപരമ്പരയുടെ പാരമ്പര്യങ്ങൾ സ്വായത്തമാക്കുന്നതിനും അദ്ദേഹം പ്രത്യേക പ്രാധാന്യം നൽകി.
1949-ൽ ഗുരുവായ ശ്രീമദ് സുകൃതീന്ദ്ര തീർഥ സ്വാമികളുടെ മഹാസമാധാനത്തിനുശേഷം ശ്രീ കാശീ മഠത്തിന്റെ ആത്മീയ നേതൃത്വം അദ്ദേഹം ഏറ്റെടുത്തു. കാശീ മഠത്തിന്റെ ഇരുപതാമത്തെ മഠാധിപതിയായി ദീർഘകാലം സമൂഹത്തിന് ആത്മീയ മാർഗദർശനം നൽകി. ദ്വൈതദർശനത്തിലും സംസ്കൃതത്തിലും ധർമശാസ്ത്രങ്ങളിലും ആഴത്തിലുള്ള പാണ്ഡിത്യം നേടിയ അദ്ദേഹം വേദാന്തപഠനത്തിലും മതപരമായ ആചാരാനുഷ്ഠാനങ്ങളിലും വലിയ അറിവ് നേടി. കന്യാകുമാരി മുതൽ ബദരീനാഥ് വരെയുള്ള വിവിധ പ്രദേശങ്ങളിൽ സഞ്ചരിച്ച് ഭക്തജനങ്ങളുമായി സംവദിക്കുകയും ധാർമികജീവിതത്തിന്റെയും ഭക്തിയുടെയും പ്രാധാന്യം പ്രചരിപ്പിക്കുകയും ചെയ്തു. അദ്ദേഹത്തിന്റെ ലാളിത്യവും കാരുണ്യവും വിശാലമായ കാഴ്ചപ്പാടും അനേകം ഭക്തരുടെ ആദരവും സ്നേഹവും നേടിയെടുത്തു.
ഗൗഡ സാരസ്വത ബ്രാഹ്മണ സമൂഹത്തിന്റെ ആത്മീയ ഐക്യത്തിനും സംഘടനാപരമായ വളർച്ചയ്ക്കും അദ്ദേഹം നൽകിയ സംഭാവനകൾ പ്രത്യേകം എടുത്തുപറയേണ്ടതാണ്. ഇന്ത്യയുടെ വിവിധ ഭാഗങ്ങളിൽ താമസിക്കുന്ന കൊങ്കണി സംസാരിക്കുന്ന കുടുംബങ്ങളെയും ഭക്തജനങ്ങളെയും കാശീ മഠത്തിന്റെ ആത്മീയ പാരമ്പര്യവുമായി ബന്ധിപ്പിക്കുന്നതിൽ അദ്ദേഹത്തിന്റെ നേതൃത്വം വലിയ പങ്കുവഹിച്ചു. മഠത്തിന്റെ പാരമ്പര്യവും ആചാരങ്ങളും വിശ്വാസങ്ങളും അടുത്ത തലമുറയിലേക്ക് കൈമാറുന്നതിനൊപ്പം സമൂഹത്തിൽ പരസ്പരസഹകരണത്തിന്റെയും ഐക്യത്തിന്റെയും സന്ദേശവും അദ്ദേഹം ഉയർത്തിപ്പിടിച്ചു. ആത്മീയതയെ ആരാധനാക്രമങ്ങളിൽ മാത്രം ഒതുക്കാതെ വിദ്യാഭ്യാസം, സേവനം, സാമൂഹിക ഉത്തരവാദിത്വം എന്നിവയുമായി ബന്ധിപ്പിച്ച അദ്ദേഹത്തിന്റെ പ്രവർത്തനരീതി സമൂഹത്തിന് ദീർഘകാലം വഴികാട്ടിയായി.
വിദ്യാഭ്യാസത്തിനും സാമൂഹികക്ഷേമത്തിനും അദ്ദേഹം പ്രത്യേക പ്രാധാന്യം നൽകി. 1956-ൽ ഉഡുപ്പിയിൽ ചതുര്‍മാസ വ്രതം അനുഷ്ഠിക്കുന്നതിനിടെ സമൂഹത്തിന്റെ സാമൂഹികവും സാമ്പത്തികവുമായ ഉന്നമനത്തിനായി ഒരു സംഘടന രൂപീകരിക്കണമെന്ന ആശയം മുന്നോട്ടുവെച്ചു. തുടർന്ന് 1959 ജൂൺ 6-ന് ശ്രീ കാശീ മഠ വെൽഫെയർ ഫണ്ട് രജിസ്റ്റർ ചെയ്ത് പ്രവർത്തനം ആരംഭിച്ചു. വിദ്യാർഥികൾക്ക് വിദ്യാഭ്യാസസഹായം നൽകുക, സാമ്പത്തികമായി പിന്നാക്കം നിൽക്കുന്നവരെ സഹായിക്കുക, സാമൂഹികവും സാംസ്കാരികവുമായ പുരോഗതിക്ക് അവസരങ്ങൾ സൃഷ്ടിക്കുക തുടങ്ങിയ ലക്ഷ്യങ്ങളോടെയായിരുന്നു ഈ സംരംഭം. 1965-ൽ ബസ്റൂരിൽ ആരംഭിച്ച ഭുവനേന്ദ്ര ബാലകാശ്രമവും അദ്ദേഹത്തിന്റെ വിദ്യാഭ്യാസ-സാമൂഹിക കാഴ്ചപ്പാടിന്റെ പ്രധാന ഉദാഹരണമാണ്. മതപരമായ അറിവിനൊപ്പം അച്ചടക്കവും മൂല്യബോധവും വളർത്തുന്ന വിദ്യാഭ്യാസത്തിന് അദ്ദേഹം നൽകിയ പ്രാധാന്യം പ്രത്യേകം ശ്രദ്ധേയമാണ്.
2026 മാർച്ച് 31-ന് അദ്ദേഹത്തിന്റെ ജന്മശതാബ്ദി ദിനത്തിൽ പ്രധാനമന്ത്രി നരേന്ദ്ര മോദി ആദരാഞ്ജലികൾ അർപ്പിച്ചു. സേവനത്തിനും ആത്മീയതയ്ക്കും ജീവിതം സമർപ്പിച്ച സ്വാമികൾ നിരവധി സ്ഥാപനങ്ങളിലൂടെ വിദ്യാഭ്യാസത്തിനും സാമൂഹികക്ഷേമത്തിനും സംഭാവനകൾ നൽകിയതും ഇന്ത്യൻ സംസ്കാരത്തിന്റെയും മൂല്യവ്യവസ്ഥയുടെയും സംരക്ഷണത്തിനായി പ്രവർത്തിച്ചതും പ്രധാനമന്ത്രി അനുസ്മരിച്ചു. ദേശീയതലത്തിൽ അദ്ദേഹത്തിന്റെ സംഭാവനകൾക്ക് ലഭിച്ച ഈ ആദരവ് കൊങ്കണി സമൂഹത്തിനും കാശീ മഠത്തിന്റെ അനുയായികൾക്കും ഏറെ സന്തോഷം പകരുന്നതായിരുന്നു.
2026 സെപ്റ്റംബർ 25-ന് കേന്ദ്ര ധനമന്ത്രാലയത്തിലെ സാമ്പത്തികകാര്യ വകുപ്പ് പുറപ്പെടുവിച്ച ഗസറ്റ് വിജ്ഞാപനം അനുസരിച്ചാണ് സുധീന്ദ്ര തീർഥ സ്വാമികളുടെ ജന്മശതാബ്ദിയോടനുബന്ധിച്ച് 100 രൂപയുടെ സ്മാരക വെള്ളിനാണയം പുറത്തിറക്കുന്നതിനുള്ള നിയമങ്ങൾ വിജ്ഞാപനം ചെയ്തത്. നാണയത്തിന്റെ ഒരു വശത്ത് അശോകസ്തംഭത്തിലെ സിംഹമുദ്രയും അതിനു താഴെ സത്യമേവ ജയതേ എന്ന ആപ്തവാക്യവും ഭാരത്, ഇന്ത്യ എന്നീ പേരുകളും 100 രൂപയുടെ മൂല്യവും ആലേഖനം ചെയ്തിരിക്കുന്നു. മറുവശത്ത് ശ്രീ സുധീന്ദ്ര തീർഥ സ്വാമികളുടെ ചിത്രവും അദ്ദേഹത്തിന്റെ ജന്മശതാബ്ദിയെ സൂചിപ്പിക്കുന്ന ലിഖിതങ്ങളും ശ്രീ കാശീ മഠ സ്ഥാപനത്തിന്റെ പേരും 2026 എന്ന വർഷവും ഉൾപ്പെടുത്തിയിരിക്കുന്നു.
99.9 ശതമാനം ശുദ്ധിയുള്ള വെള്ളിയിൽ നിർമ്മിച്ചിരിക്കുന്ന നാണയത്തിന് 40 ഗ്രാം ഭാരവും 44 മില്ലിമീറ്റർ വ്യാസവുമാണുള്ളത്. അരികിൽ 200 വെട്ടുകളും ഉണ്ടായിരിക്കും. നാണയത്തിന്റെ രൂപകൽപ്പനയും നിർമ്മാണത്തിനുള്ള മാനദണ്ഡങ്ങളും കേന്ദ്രസർക്കാരിന്റെ ഔദ്യോഗിക വിജ്ഞാപനത്തിൽ വ്യക്തമാക്കിയിട്ടുണ്ട്. ഇന്ത്യാ ഗവൺമെന്റ് മിന്റ്, മുംബൈയാണ് നാണയത്തിന്റെ നിർമ്മാണവുമായി ബന്ധപ്പെട്ട ഔദ്യോഗിക സ്ഥാപനം.
കേന്ദ്രസർക്കാരിന്റെ അംഗീകാരത്തോടെ പുറത്തിറക്കിയ ഈ സ്മാരക വെള്ളിനാണയം 2026 ഒക്ടോബർ 31-ന് വാരണാസിയിലെ ബ്രഹ്മഘട്ടിലുള്ള ശ്രീ കാശീ മൂലമഠത്തിൽവെച്ച് കാശീ മഠാധിപതി പരമപൂജ്യ ശ്രീമദ് സംയമീന്ദ്ര തീർഥ സ്വാമികൾ പ്രകാശനം ചെയ്തു. ശ്രീമദ് സംയമീന്ദ്ര തീർഥ സ്വാമികളുടെ ഇരുപത്തിയഞ്ചാമത് ചതുര്‍മാസ വ്രതത്തോടനുബന്ധിച്ച് നടന്ന ചതുര്‍മാസ മഹാസഭയുടെ ഭാഗമായിട്ടായിരുന്നു ചടങ്ങ്. മംഗളൂരുവിലെ ശ്രീ സുകൃതീന്ദ്ര സ്വാമി സേവാ പ്രതിഷ്ഠാനത്തിന്റെ നേതൃത്വത്തിലും മുൻകൈയിലുമാണ് നാണയത്തിന് ആവശ്യമായ അംഗീകാരം ലഭിക്കുന്നതിനുള്ള പ്രവർത്തനങ്ങൾ ഏകോപിപ്പിച്ചത്. വിവിധ ഗൗഡ സാരസ്വത ബ്രാഹ്മണ സമാജങ്ങളുടെയും മഠവുമായി ബന്ധപ്പെട്ട സ്ഥാപനങ്ങളുടെയും പ്രതിനിധികളും പ്രമുഖ വ്യക്തികളും ചടങ്ങിൽ പങ്കെടുത്തു. ഔദ്യോഗിക ഗസറ്റ് വിജ്ഞാപനത്തിലൂടെ പ്രഖ്യാപിക്കപ്പെട്ട സ്മാരക നാണയം മഠാധിപതിയുടെ കൈകളിലൂടെ പ്രകാശനം ചെയ്യപ്പെട്ടത് ജന്മശതാബ്ദി ആഘോഷങ്ങൾക്ക് കൂടുതൽ പ്രാധാന്യം നൽകി. ഗുരുപരമ്പരയോടുള്ള ആദരവും സമൂഹത്തിന്റെ കൂട്ടായ പരിശ്രമവും ഒരുമിച്ചുചേർന്ന ഈ ചടങ്ങ് കൊങ്കണി സമൂഹത്തിന് അവിസ്മരണീയമായ അനുഭവമായി.
ഗോവയിൽനിന്ന് കേരളത്തിലേക്കും കർണാടകത്തിലേക്കും ഇന്ത്യയുടെ വിവിധ ഭാഗങ്ങളിലേക്കും വ്യാപിച്ചുകിടക്കുന്ന ഗൗഡ സാരസ്വത ബ്രാഹ്മണ സമൂഹത്തിന്റെ ചരിത്രത്തിൽ ശ്രീ കാശീ മഠത്തിനും അതിന്റെ ഗുരുപരമ്പരയ്ക്കും വലിയ സ്ഥാനമുണ്ട്. കൊങ്കണി ഭാഷയും സംസ്കാരവും ആചാരങ്ങളും വിശ്വാസങ്ങളും തലമുറകളിലേക്ക് കൈമാറുന്നതിൽ ഇത്തരം ആത്മീയ സ്ഥാപനങ്ങൾ വഹിച്ച പങ്ക് വിലമതിക്കാനാവാത്തതാണ്. ഈ പാരമ്പര്യത്തിന്റെ തുടർച്ചയ്ക്കായി സുധീന്ദ്ര തീർഥ സ്വാമികൾ നൽകിയ സംഭാവനകൾ സമൂഹം എന്നും ആദരവോടെ ഓർമിക്കും. അദ്ദേഹത്തിന്റെ ആത്മീയ ദർശനങ്ങളും വിദ്യാഭ്യാസ-സാമൂഹിക പ്രവർത്തനങ്ങളും പുതിയ തലമുറയ്ക്ക് പഠിക്കാനും പിന്തുടരാനും കഴിയുന്ന മഹത്തായ മാതൃകകളാണ്.
ഒരു ആത്മീയാചാര്യന്റെ ജന്മശതാബ്ദിയെ ആദരിക്കുന്നതിനപ്പുറം ഒരു സമൂഹത്തിന്റെ ചരിത്രത്തിനും ആത്മീയ പൈതൃകത്തിനും ദേശീയതലത്തിൽ ലഭിക്കുന്ന അംഗീകാരമായാണ് ഈ സ്മാരക വെള്ളിനാണയത്തെ കാണേണ്ടത്. ഗുരുപരമ്പരയുടെ മഹത്വവും സമൂഹത്തിന്റെ ഐക്യവും സേവനപാരമ്പര്യവും ഓർമിപ്പിക്കുന്ന ഈ നാണയം വരുംതലമുറകൾക്കും പ്രചോദനമാകും. ശ്രീമദ് സുധീന്ദ്ര തീർഥ സ്വാമികളുടെ ജീവിതവും സേവനങ്ങളും കൊങ്കണി സമൂഹത്തിന്റെ ചരിത്രത്തിൽ എന്നും ആദരവോടെ നിലനിൽക്കും.
