തിരുവനന്തപുരം: മുഖ്യമന്ത്രി സ്ഥാനത്തെക്കുറിച്ചുള്ള പൊതുചർച്ചകൾ ഒഴിവാക്കണമെന്ന് ആവശ്യപ്പെട്ട് കെ.പി.സി.സി അധ്യക്ഷൻ സണ്ണി ജോസഫ് കോൺഗ്രസ് നേതാക്കൾക്ക് മുന്നറിയിപ്പ് നൽകി. തെരഞ്ഞെടുപ്പ് ഫലം വരുന്നതിന് മുൻപ് ഇത്തരം ചര്ച്ചകൾ നടത്തുന്നത് അനുചിതമാണെന്നും അദ്ദേഹം വ്യക്തമാക്കി.
മുഖ്യമന്ത്രി ആരാകുമെന്ന് തീരുമാനിക്കുന്നത് പാർട്ടി ഹൈക്കമാൻഡാണ്. അതിനാൽ നേതാക്കൾ സാമൂഹ്യമാധ്യമങ്ങളിലോ പൊതുവേദികളിലോ വ്യക്തിപരമായ അഭിപ്രായങ്ങൾ പ്രകടിപ്പിക്കുന്നത് ഒഴിവാക്കണമെന്നും സണ്ണി ജോസഫ് നിർദേശിച്ചു. ഫലം പുറത്തുവന്നതിന് ശേഷം തെരഞ്ഞെടുക്കപ്പെട്ട എം.എൽ.എമാരുമായി കൂടിയാലോചിച്ചായിരിക്കും തീരുമാനം ഉണ്ടാകുക എന്നും അദ്ദേഹം പറഞ്ഞു.
മുഖ്യമന്ത്രി സ്ഥാനാർത്ഥിയെ കുറിച്ചുള്ള അനാവശ്യമായ ചർച്ചകൾ പാർട്ടിയിലെ ഐക്യത്തെ ബാധിക്കാനും പ്രവർത്തകരിൽ ആശയക്കുഴപ്പം സൃഷ്ടിക്കാനും ഇടയാക്കുമെന്ന് അദ്ദേഹം മുന്നറിയിപ്പ് നൽകി. ഇത്തരം അഭിപ്രായങ്ങൾ പാർട്ടിയുടെ ആഭ്യന്തര വേദികളിൽ മാത്രം പങ്കുവെക്കണമെന്നും അദ്ദേഹം കൂട്ടിച്ചേർത്തു.
തിരഞ്ഞെടുപ്പ് ഫലം വരുന്നതിന് മുമ്പ് പാർട്ടി ഏകോപനത്തോടെയാണ് മുന്നോട്ട് പോകേണ്ടതെന്നും, പൊതുവേദികളിലെ അനാവശ്യ ചർച്ചകൾ ഒഴിവാക്കണമെന്നും സണ്ണി ജോസഫ് വീണ്ടും ആവർത്തിച്ചു.
