ന്യൂഡൽഹി: ബംഗാൾ ഉൾക്കടലിൽ രൂപംകൊണ്ട ‘മുറാസു’ ചുഴലിക്കാറ്റ് തീവ്ര ചുഴലിക്കാറ്റായി ശക്തിപ്രാപിച്ചതോടെ ആന്ധ്രാപ്രദേശിലും തമിഴ്‌നാട്ടിലും കനത്ത ജാഗ്രതാനിർദേശം പുറപ്പെടുവിച്ചു. പടിഞ്ഞാറ്-വടക്കുപടിഞ്ഞാറൻ ദിശയിൽ സഞ്ചരിക്കുന്ന ചുഴലിക്കാറ്റ് ആന്ധ്രാപ്രദേശിലെ നെല്ലൂരിനും നർസാപുറിനും ഇടയിൽ, ഒങ്കോലിന് സമീപത്തായി നാളെ (ചൊവ്വാഴ്ച) പുലർച്ചെയോടെ കരതൊടാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
കരതൊടുന്ന സമയത്ത് മണിക്കൂറിൽ 100 മുതൽ 110 കിലോമീറ്റർ വരെയും ചിലയവസരങ്ങളിൽ 120 കിലോമീറ്റർ വരെയും വേഗതയിൽ കാറ്റടിക്കാൻ സാധ്യതയുണ്ട്. ചുഴലിക്കാറ്റിന്റെ പശ്ചാത്തലത്തിൽ തീരദേശ ആന്ധ്രയിലും വടക്കൻ തമിഴ്നാട് തീരങ്ങളിലും കേന്ദ്ര കാലാവസ്ഥാ വകുപ്പ് റെഡ് അലർട്ട് പ്രഖ്യാപിച്ചിട്ടുണ്ട്. ആന്ധ്രാപ്രദേശിലെ കൃഷ്ണ, ബാപട്‌ല, പ്രകാശം, നെല്ലൂർ, ഗുണ്ടൂർ തുടങ്ങിയ തീരദേശ ജില്ലകളിൽ അതിശക്തമായ മഴയ്ക്കും സാധ്യതയുണ്ട്.
കടൽ പ്രക്ഷുബ്ധമായിരിക്കുമെന്നതിനാൽ തമിഴ്നാട്, ആന്ധ്ര തീരങ്ങളിലും ബംഗാൾ ഉൾക്കടലിലും യാതൊരു കാരണവശാലും മത്സ്യബന്ധനത്തിന് ഇറങ്ങരുതെന്ന് അധികൃതർ കർശന നിർദേശം നൽകി. തീരപ്രദേശങ്ങളിൽ ഒന്നര മീറ്റർ വരെ ഉയരത്തിൽ കടലാക്രമണത്തിന് സാധ്യതയുള്ളതിനാൽ താഴ്ന്ന പ്രദേശങ്ങളിൽ നിന്ന് ആളുകളെ മാറ്റിപ്പാർപ്പിക്കാനുള്ള നടപടികൾ ദുരന്തനിവാരണ സേന ആരംഭിച്ചിട്ടുണ്ട്.
