കൊച്ചി: കുംഭമേളയുമായി ബന്ധപ്പെട്ട് സോഷ്യൽ മീഡിയയിൽ വൈറലായ യുവതിയുടെ പരാതിയിൽ നാല് പേർക്കെതിരെ അപകീർത്തി കേസ് രജിസ്റ്റർ ചെയ്തു. യുവതിയെ അപകീർത്തിപ്പെടുത്തുന്ന തരത്തിലുള്ള ഉള്ളടക്കങ്ങൾ സോഷ്യൽ മീഡിയ വഴി പ്രചരിപ്പിച്ചതായാണ് പരാതി.
പരാതിയുടെ അടിസ്ഥാനത്തിൽ പൊലീസ് സീറോ എഫ്ഐആർ ആയി കേസ് എടുത്തു. അധികാരപരിധി നോക്കാതെ ഏത് പൊലീസ് സ്റ്റേഷനിലും കേസ് രജിസ്റ്റർ ചെയ്യാനാകുന്ന സംവിധാനമാണ് സീറോ എഫ്ഐആർ. തുടർന്ന് കേസ് ബന്ധപ്പെട്ട സ്റ്റേഷനിലേക്ക് കൈമാറും.
സംഭവവുമായി ബന്ധപ്പെട്ട അന്വേഷണം പുരോഗമിക്കുകയാണെന്ന് പൊലീസ് അറിയിച്ചു. പ്രാഥമിക പരിശോധനയ്ക്ക് ശേഷം തുടർ നടപടികൾ സ്വീകരിക്കുമെന്നും അറിയിച്ചു.കുംഭമേളയിൽ നിന്നുള്ള വീഡിയോയിലൂടെ ശ്രദ്ധ നേടിയ യുവതിയെ ചുറ്റിപ്പറ്റി അടുത്തിടെ സോഷ്യൽ മീഡിയയിൽ വിവാദങ്ങൾ ഉയർന്നിരുന്നു.
