കോഴിക്കോട്: കാന്തപുരം എ.പി. അബൂബക്കർ മുസല്യാരുടെ എല്ലാ നിലപാടുകളോടും തനിക്ക് യോജിപ്പില്ലെന്ന് മലേഷ്യൻ പ്രധാനമന്ത്രി അൻവർ ഇബ്രാഹിം. സ്ത്രീകൾക്കും പുരുഷന്മാർക്കും തുല്യ അവകാശങ്ങളാണ് വേണ്ടതെന്ന നിലപാടും അദ്ദേഹം വ്യക്തമാക്കി. കാന്തപുരവുമായി കൂടിക്കാഴ്ച നടത്തുന്നതിന് മുന്നോടിയായാണ് അൻവർ ഇബ്രാഹിമിന്റെ പ്രതികരണം.
കാന്തപുരവുമായി ആശയപരമായ ചില വ്യത്യാസങ്ങളുണ്ടെങ്കിലും അദ്ദേഹവുമായി കൂടിക്കാഴ്ച നടത്തുന്നതിൽ തടസമില്ലെന്ന് അൻവർ ഇബ്രാഹിം വ്യക്തമാക്കി. അഭിപ്രായവ്യത്യാസങ്ങൾ നിലനിൽക്കുമ്പോഴും പരസ്പര ബഹുമാനത്തോടെയുള്ള സംവാദത്തിനാണ് പ്രാധാന്യമെന്നും അദ്ദേഹം പറഞ്ഞു.
കോഴിക്കോട്ടെത്തുന്ന മലേഷ്യൻ പ്രധാനമന്ത്രി കാന്തപുരം എ.പി. അബൂബക്കർ മുസല്യാരുമായി കൂടിക്കാഴ്ച നടത്തും. മർകസ് സെൻട്രൽ ക്യാംപസിലാണ് കൂടിക്കാഴ്ച നടക്കുക. തുടർന്ന് മടവൂർ സി.എം. വലിയുള്ളാഹിയുടെ ദർഗയും സന്ദർശിക്കുമെന്നാണ് റിപ്പോർട്ട്.
കാന്തപുരത്തിന്റെ വിവിധ സാമൂഹിക-മതപരമായ നിലപാടുകളുമായി ബന്ധപ്പെട്ട ചർച്ചകളുടെ പശ്ചാത്തലത്തിലാണ് അൻവർ ഇബ്രാഹിം തന്റെ നിലപാട് വ്യക്തമാക്കിയത്. അതേസമയം, ഏത് പ്രത്യേക നിലപാടുകളോടാണ് യോജിപ്പില്ലാത്തതെന്ന് അദ്ദേഹം വിശദീകരിച്ചിട്ടില്ല.
