മെൽബൺ: ഓസ്ട്രേലിയയിൽ ‘കിറ്റി ഫ്ലിപ്പിംഗ്’ (Kitty Flipping) എന്നറിയപ്പെടുന്ന അപകടകരമായ മയക്കുമരുന്ന് മിശ്രിതത്തിന്റെ ഉപയോഗം ആശങ്കാജനകമാംവിധം വർദ്ധിക്കുന്നതായി പുതിയ പഠനങ്ങൾ. കെറ്റാമൈൻ (Ketamine), എം.ഡി.എം.എ (MDMA) എന്നീ മയക്കുമരുന്നുകൾ ഒരേസമയം ഉപയോഗിക്കുന്ന രീതിയാണിത്. കഴിഞ്ഞ നാലര വർഷത്തിനിടെ രാജ്യത്തെ കെറ്റാമൈൻ ഉപയോഗം ഇരട്ടിയിലധികമായതായി മലിനജല സാമ്പിളുകൾ (Wastewater study) കേന്ദ്രീകരിച്ച് നടത്തിയ പഠനം വെളിപ്പെടുത്തുന്നു.
എന്താണ് കിറ്റി ഫ്ലിപ്പിംഗ്?
സാധാരണയായി ആദ്യം എം.ഡി.എം.എ കഴിക്കുകയും അതിന് പിന്നാലെ കെറ്റാമൈൻ ഉപയോഗിക്കുകയും ചെയ്യുന്ന രീതിയാണിത്. മയക്കുമരുന്ന് നൽകുന്ന ലഹരിയുടെ ആഘാതം വർദ്ധിപ്പിക്കാനാണ് ഉപയോക്താക്കൾ ഈ രീതി പിന്തുടരുന്നത്. എന്നാൽ ഈ സംയോജനം ശരീരത്തിന് നൽകുന്ന ആഘാതം അത്യന്തം മാരകമാണ്. ഹോളിവുഡ് താരം മാത്യു പെറിയുടെ മരണം കെറ്റാമൈൻ അമിത അളവിൽ ഉള്ളിൽ ചെന്നാണെന്ന് കണ്ടെത്തിയതോടെയാണ് ഈ മരുന്നിന്റെ ദുരുപയോഗം ആഗോളതലത്തിൽ ചർച്ചയായത്.
അപകടസാധ്യതകൾ:
ശരീരതാപനിലയിലെ മാറ്റം: എം.ഡി.എം.എ ശരീരതാപനിലയും ഹൃദയമിടിപ്പും വർദ്ധിപ്പിക്കുമ്പോൾ, താപനില നിയന്ത്രിക്കാനുള്ള ശരീരത്തിന്റെ കഴിവിനെ കെറ്റാമൈൻ തകർക്കുന്നു. ഇത് ശരീരതാപനില അപകടകരമായ നിലയിലേക്ക് ഉയരാൻ കാരണമാകും.
ഹൃദയാഘാതം: രണ്ട് മയക്കുമരുന്നുകളുടെയും സംയോജനം ഹൃദയത്തിന് കടുത്ത സമ്മർദ്ദം നൽകുകയും മരണത്തിന് വരെ കാരണമാവുകയും ചെയ്യാം.
സെറോട്ടോണിൻ സിൻഡ്രോം: ശരീരത്തിൽ സെറോട്ടോണിന്റെ അളവ് അമിതമായി വർദ്ധിക്കുന്നത് നാഡീവ്യൂഹത്തെ ബാധിക്കുകയും മരണം വരെ സംഭവിക്കാവുന്ന ‘സെറോട്ടോണിൻ സിൻഡ്രോമിന്’ വഴിവെക്കുകയും ചെയ്യുന്നു.
അഡ്ലെയ്ഡ് സർവ്വകലാശാലയിലെ സ്കൂൾ ഓഫ് ഫാർമസിയിലെ പ്രൊഫസർ കോബസ് ഗെർബറുടെ നേതൃത്വത്തിലാണ് പഠനം നടന്നത്. 2020-ൽ 1000 പേർക്ക് പ്രതിദിനം 2.7 മില്ലിഗ്രാം എന്ന നിലയിലായിരുന്ന കെറ്റാമൈൻ ഉപയോഗം, 2025 ഏപ്രിലിലെ കണക്കനുസരിച്ച് 5.8 മില്ലിഗ്രാം ആയി ഉയർന്നു. നഗരങ്ങളിലെ സമ്പന്ന മേഖലകളിലാണ് ഇതിന്റെ ഉപയോഗം കൂടുതലായി കാണപ്പെടുന്നത്.
മയക്കുമരുന്ന് വിപണിയിലെ ‘പിങ്ക് കൊക്കെയ്ൻ’ (Pink Cocaine) എന്നറിയപ്പെടുന്ന മിശ്രിതത്തിലും കെറ്റാമൈൻ പ്രധാന ഘടകമാണ്. വൺ ഡയറക്ഷൻ താരം ലിയാം പെയ്നിന്റെ മരണത്തിന് പിന്നിലും ഇത്തരം ലഹരിമരുന്നുകളുടെ സാന്നിധ്യം കണ്ടെത്തിയിരുന്നു. വിനോദാവശ്യങ്ങൾക്കായി ഇത്തരം മരുന്നുകൾ ഉപയോഗിക്കുന്നത് ആത്മഹത്യാപരമാണെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു
