ബെയ്ജിംഗ്: ചൈനയിലെ ഹുനാൻ പ്രവിശ്യയിൽ പടക്ക നിർമ്മാണശാലയിൽ ഉണ്ടായ ശക്തമായ സ്ഫോടനത്തിൽ കുറഞ്ഞത് 26 പേർ കൊല്ലപ്പെട്ടു. 61 പേർക്ക് പരിക്കേറ്റതായി അധികൃതർ അറിയിച്ചു.
ലിയുയാങ് നഗരത്തിലാണ് തിങ്കളാഴ്ച വൈകുന്നേരം സ്ഫോടനം ഉണ്ടായത്. സ്ഫോടനത്തെ തുടർന്ന് ഫാക്ടറിയും സമീപ പ്രദേശങ്ങളും വൻനാശനഷ്ടം നേരിട്ടു.
സംഭവത്തെ തുടർന്ന് നൂറുകണക്കിന് രക്ഷാപ്രവർത്തകരെ വിന്യസിച്ച് തിരച്ചിൽ തുടരുകയാണ്. അപകടസാധ്യതയുള്ള വസ്തുക്കൾ ഉണ്ടായതിനാൽ സമീപ പ്രദേശങ്ങളിൽ നിന്ന് ആളുകളെ ഒഴിപ്പിക്കുകയും സുരക്ഷാ വളയം സൃഷ്ടിക്കുകയും ചെയ്തു.
സംഭവത്തിന്റെ കാരണത്തെ കുറിച്ച് അന്വേഷണം ആരംഭിച്ചതായി അധികൃതർ അറിയിച്ചു. ചൈനീസ് പ്രസിഡന്റ് ഷി ജിൻപിംഗ് സമഗ്രമായ അന്വേഷണം നടത്താനും ഉത്തരവാദികളെ കണ്ടെത്താനും നിർദേശം നൽകിയിട്ടുണ്ട്.
പടക്ക നിർമ്മാണത്തിൽ പ്രശസ്തമായ ലിയുയാങ് മേഖലയിലെ ഇത്തരം അപകടങ്ങൾ സുരക്ഷാ മാനദണ്ഡങ്ങളെക്കുറിച്ചുള്ള ആശങ്കകൾ വീണ്ടും ഉയർത്തിയിരിക്കുകയാണ്.
