തെഹ്റാൻ: ഇറാനിൽ വീണ്ടും ശക്തമായ സ്ഫോടനങ്ങൾ റിപ്പോർട്ട് ചെയ്തു. തെക്കൻ തുറമുഖ നഗരങ്ങളായ ബന്ദർ അബ്ബാസ്, സിരിക്ക് എന്നിവിടങ്ങളിലാണ് രാത്രിയോടെ തുടർച്ചയായ സ്ഫോടനങ്ങൾ ഉണ്ടായതെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ആക്രമണത്തിന് പിന്നാലെ പ്രദേശങ്ങളിൽ വൻതോതിൽ നാശനഷ്ടമുണ്ടായതായും നിരവധി പേർ കൊല്ലപ്പെടുകയും പരിക്കേൽക്കുകയും ചെയ്തതായും ഇറാൻ അധികൃതർ അറിയിച്ചു.
അമേരിക്കൻ സെൻട്രൽ കമാൻഡ് (CENTCOM) ഹോർമുസ് കടലിടുക്കിലെ നാവികഗതാഗതത്തിന് ഭീഷണിയാകുന്ന ഇറാന്റെ സൈനിക ശേഷി ദുർബലപ്പെടുത്തുക എന്ന ലക്ഷ്യത്തോടെയാണ് ആക്രമണം നടത്തിയതെന്ന് പ്രസ്താവനയിൽ വ്യക്തമാക്കി.
തുടർച്ചയായ സ്ഫോടനങ്ങൾ മൂലം തീരപ്രദേശങ്ങളിലെ ജനങ്ങൾ ഭീതിയിലാണെന്ന് പ്രദേശവാസികൾ പറഞ്ഞു. ചില സ്ഥലങ്ങളിൽ കുടിവെള്ള സംഭരണ സംവിധാനങ്ങൾക്കും മറ്റ് അടിസ്ഥാന സൗകര്യങ്ങൾക്കും കേടുപാടുകൾ സംഭവിച്ചതായും റിപ്പോർട്ടുകളുണ്ട്.
ഇതിനിടെ, ആക്രമണത്തിൽ സാധാരണ ജനങ്ങൾക്കും വലിയ തിരിച്ചടിയുണ്ടായതായി ഇറാൻ ആരോപിച്ചു. മേഖലയിൽ സംഘർഷാവസ്ഥ തുടരുന്നതിനാൽ കൂടുതൽ സുരക്ഷാ നടപടികൾ സ്വീകരിച്ചിരിക്കുകയാണ്.
