ലക്നൗ: ഉത്തർപ്രദേശിലെ ലക്നൗവിൽ പതിനൊന്ന് വയസ്സുള്ള ഇരട്ട സഹോദരിമാരെ പിതാവ് ക്രൂരമായി കൊലപ്പെടുത്തി. സംഭവത്തിൽ പ്രതിയായ ശശി രഞ്ജൻ മിശ്രയെ പോലീസ് അറസ്റ്റ് ചെയ്തു. കുടുംബവഴക്കിനെത്തുടർന്ന് ശനിയാഴ്ച പുലർച്ചെയാണ് നാടിനെ നടുക്കിയ ഈ കൊലപാതകം നടന്നത്.
ലക്നൗവിലെ ഇന്ദിരാനഗർ പോലീസ് സ്റ്റേഷൻ പരിധിയിലാണ് സംഭവം. സംഭവസമയത്ത് പ്രതിയുടെ ഭാര്യ വീട്ടിലുണ്ടായിരുന്നില്ല. കുട്ടികളുടെ നിലവിളി കേട്ടെത്തിയ അയൽവാസികളാണ് പോലീസിൽ വിവരമറിയിച്ചത്.
പ്രതിക്ക് മാനസികാസ്വാസ്ഥ്യമുള്ളതായി സംശയിക്കുന്നതായി പോലീസ് പറഞ്ഞു. ദമ്പതികൾ തമ്മിൽ നിലനിന്നിരുന്ന തർക്കങ്ങളാണ് മക്കളെ വധിക്കാൻ പ്രകോപനമായതെന്ന് കരുതപ്പെടുന്നു. കൊലപാതകത്തിന് ഉപയോഗിച്ച ആയുധം പോലീസ് കണ്ടെടുത്തിട്ടുണ്ട്. ഫോറൻസിക് വിദഗ്ധർ സ്ഥലത്തെത്തി തെളിവുകൾ ശേഖരിച്ചു.കുട്ടികളുടെ മൃതദേഹങ്ങൾ പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി. പ്രതിക്കെതിരെ കൊലപാതകക്കുറ്റത്തിന് കേസെടുത്ത് ലക്നൗ പോലീസ് വിശദമായ അന്വേഷണം നടത്തിവരികയാണ്.
