കോഴിക്കോട്: കളിച്ചുകൊണ്ടിരിക്കുന്നതിനിടെ തോട്ടിൽ വീണ് അഞ്ചുവയസ്സുകാരിക്ക് ദാരുണാന്ത്യം. നരിക്കുനി കാരുകുളങ്ങര പുതുശ്ശേരിപ്പാലത്തിന് സമീപം കാവുംപൊയിൽ വേലാകണ്ടിയിൽ റഊഫ്-സബീന ദമ്പതികളുടെ മകൾ ഹന ഫാത്തിമയാണ് മരിച്ചത്. എൽ.കെ.ജി വിദ്യാർത്ഥിനിയാണ്.
ബുധനാഴ്ചയോടെയാണ് നാടിനെ നടുക്കിയ അപകടം സംഭവിച്ചത്. വീടിന് സമീപത്തെ തോട്ടിൽ വീണ കുഞ്ഞിനെ ഉടൻതന്നെ നാട്ടുകാരും വീട്ടുകാരും ചേർന്ന് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കളിചിരികളോടെ നാടിന്റെ പ്രിയങ്കരിയായിരുന്ന കുഞ്ഞു ഹനയുടെ അപ്രതീക്ഷിത വിയോഗം നരിക്കുനിയിലെയും പരിസരപ്രദേശങ്ങളിലെയും ജനങ്ങളെയാകെ കണ്ണീരിലാഴ്ത്തി.
ആശുപത്രി നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകി. മാതാപിതാക്കളുടെയും കുടുംബത്തിന്റെയും തീരാദുഃഖത്തിൽ പ്രദേശവാസികളും ജനപ്രതിനിധികളും പങ്കുചേർന്നു.
