കാഠ്മണ്ഡു: നേപ്പാളിൽ ഭോട്ടെകോശി നദി കരകവിഞ്ഞുണ്ടായ മിന്നൽപ്രളയത്തിൽ മരണം 170 ആയി. ദുരന്തത്തിൽ 600ലേറെ വിനോദസഞ്ചാരികളെ കാണാതായതായി നേപ്പാൾ സർക്കാർ അറിയിച്ചു. ഇതിൽ ഏകദേശം 250 പേർ ഇന്ത്യക്കാരാണെന്ന് ഇന്ത്യൻ വിദേശകാര്യ മന്ത്രാലയം സ്ഥിരീകരിച്ചു.
നേപ്പാൾ ടൂറിസം ബോർഡിന്റെ കണക്കുപ്രകാരം കാണാതായ വിനോദസഞ്ചാരികളുടെ എണ്ണം 384 ആണ്. ഇതിൽ 105 പേർ ഇന്ത്യക്കാരാണെന്നായിരുന്നു ആദ്യഘട്ട വിവരം. അതേസമയം, വിവിധ സ്രോതസ്സുകളിൽ നിന്നുള്ള കണക്കുകൾ തമ്മിൽ വ്യത്യാസമുള്ളതിനാൽ കാണാതായവരുടെ എണ്ണം സംബന്ധിച്ച് അന്തിമ സ്ഥിരീകരണം ലഭിച്ചിട്ടില്ല.
തമിഴ്നാട്ടിൽനിന്ന് നേപ്പാളിലേക്ക് പോയ 37 പേരെയും ഇഷ ഫൗണ്ടേഷൻ വഴി എത്തിയ 77 പേരെയും കുറിച്ച് വിവരമില്ലെന്നും റിപ്പോർട്ടുണ്ട്. ദുരന്തബാധിത മേഖലകളിൽ നേപ്പാൾ സൈന്യത്തിന്റെ നേതൃത്വത്തിൽ രക്ഷാപ്രവർത്തനം തുടരുകയാണ്.
പ്രളയത്തിൽ 19 പാലങ്ങളും ഏകദേശം 40 കിലോമീറ്റർ റോഡുകളും നിരവധി കെട്ടിടങ്ങളും പൂർണമായി തകർന്നു. ദുരന്തത്തിന്റെ പശ്ചാത്തലത്തിൽ ഇന്ത്യയിലെ ഉത്തർപ്രദേശ്, ബിഹാർ സംസ്ഥാനങ്ങളിലെ നദീതീരങ്ങളിൽ ജാഗ്രതാ നിർദേശം പുറപ്പെടുവിച്ചിട്ടുണ്ട്.
ടിബറ്റൻ മേഖലയിൽ 4.4 തീവ്രത രേഖപ്പെടുത്തിയ ഭൂചലനത്തെ തുടർന്നുണ്ടായ ഹിമപാതമാണ് നദിയിലെ വെള്ളപ്പൊക്കത്തിന് കാരണമായതെന്നാണ് നേപ്പാൾ സർക്കാർ പറയുന്നത്. എന്നാൽ ദുരന്തത്തിന്റെ കാരണത്തെക്കുറിച്ച് കൂടുതൽ പരിശോധനകൾ തുടരുകയാണ്.
