തിരുവനന്തപുരം: ഫുട്ബോൾ താരം ലയണൽ മെസിയെ കേരളത്തിലെത്തിച്ച് മത്സരം സംഘടിപ്പിക്കാനുള്ള പദ്ധതിയുമായി ബന്ധപ്പെട്ട സാമ്പത്തിക ഇടപാടുകളിൽ ജിഎസ്ടി വെട്ടിപ്പ് നടന്നെന്ന ആരോപണത്തിൽ വിജിലൻസ് അന്വേഷണം നടത്തും. സംസ്ഥാനത്തിന് ലഭിക്കേണ്ടിയിരുന്ന 26 കോടി രൂപയോളം ജിഎസ്ടി പിരിച്ചെടുക്കുന്നതിൽ ഉദ്യോഗസ്ഥർക്ക് വീഴ്ച സംഭവിച്ചോയെന്നും അന്വേഷണം പരിശോധിക്കും.
നികുതി പിരിവിൽ വീഴ്ച വരുത്തിയതായി ആരോപണമുള്ള ഉദ്യോഗസ്ഥർക്ക് ജിഎസ്ടി കമ്മിഷണർ നോട്ടീസ് നൽകിയിട്ടുണ്ട്. ഉദ്യോഗസ്ഥരും പരിപാടിയുടെ സ്പോൺസറും തമ്മിൽ ബന്ധമുണ്ടായിരുന്നോയെന്നും വിജിലൻസ് പരിശോധിക്കും.
മെസിയെയും അർജന്റീന ടീമിനെയും കേരളത്തിലെത്തിച്ച് മത്സരം നടത്താനുള്ള പദ്ധതി 2023ൽ പ്രഖ്യാപിച്ചെങ്കിലും പിന്നീട് നടപ്പായില്ല. പരിപാടിയുടെ സ്പോൺസറായ റിപ്പോർട്ടർ ബ്രോഡ്കാസ്റ്റിങ് കമ്പനിക്കെതിരെ എൻഫോഴ്സ്മെന്റ് ഡയറക്ടറേറ്റ് FEMA കേസ് രജിസ്റ്റർ ചെയ്തിരുന്നു. നിലവിൽ ജിഎസ്ടി വെട്ടിപ്പ് അന്വേഷണവിധേയമായ ആരോപണം മാത്രമാണ്.
