ലഖ്നൗ: ഉത്തർപ്രദേശിൽ കഴിഞ്ഞ ദിവസങ്ങളിലുണ്ടായ ശക്തമായ മഴയിലും കാറ്റിലും 56 പേർ മരിച്ചു. 46 പേർക്ക് പരുക്കേറ്റതായി സംസ്ഥാന ദുരിതാശ്വാസ കമ്മീഷണറുടെ ഓഫീസ് അറിയിച്ചു. സെപ്റ്റംബർ 25 മുതൽ 27 രാവിലെ വരെയുള്ള കണക്കാണിത്.
സംസ്ഥാനത്തെ 75 ജില്ലകളിൽ 56 ജില്ലകളിലും സാധാരണയിലും അധികം മഴ ലഭിച്ചു. 48 മണിക്കൂറിനിടെ സംസ്ഥാനത്ത് ശരാശരി 66.5 മില്ലിമീറ്റർ മഴ ലഭിച്ചപ്പോൾ സാധാരണ ലഭിക്കേണ്ടത് 7.6 മില്ലിമീറ്ററായിരുന്നു. ഫറൂഖാബാദ്, കനൗജ്, ഷാജഹാൻപൂർ, ഹമീർപുർ, മഹോബ തുടങ്ങിയ ജില്ലകളിലാണ് അസാധാരണമായ മഴ രേഖപ്പെടുത്തിയത്.
സീതാപുരിലാണ് ഏറ്റവും കൂടുതൽ മഴക്കെടുതി മരണങ്ങൾ റിപ്പോർട്ട് ചെയ്തത്—ഏഴ്. ലഖിംപുർ ഖേരി, ബഹ്റൈച്ച്, ബൽറാംപുർ ജില്ലകളിൽ അഞ്ചുപേർ വീതവും അയോധ്യ, ഗോരഖ്പുർ എന്നിവിടങ്ങളിൽ നാലുപേർ വീതവും മരിച്ചു. മഴയിൽ 1,021 വീടുകൾക്ക് കേടുപാടുകൾ സംഭവിച്ചതായും 107 മൃഗങ്ങൾ ചത്തതായും റിപ്പോർട്ടുണ്ട്.
കനത്ത മഴയെ തുടർന്ന് വിവിധ പ്രദേശങ്ങളിൽ വെള്ളക്കെട്ടും വെള്ളപ്പൊക്കസമാന സാഹചര്യവും രൂപപ്പെട്ടു. കുടുങ്ങിയവരെ സുരക്ഷിത സ്ഥാനങ്ങളിലേക്ക് മാറ്റുന്നതിനും ദുരിതാശ്വാസ പ്രവർത്തനങ്ങൾ ഏകോപിപ്പിക്കുന്നതിനുമായി രക്ഷാപ്രവർത്തനങ്ങൾ തുടരുകയാണ്.
