മെൽബൺ: വീട്ടിൽ അതിക്രമിച്ചുകയറിയ കൗമാരക്കാരായ അക്രമികളിൽ നിന്ന് കുടുംബത്തെ രക്ഷിക്കാൻ ശ്രമിക്കുന്നതിനിടെ നാൽപ്പത്തിയെട്ടുകാരനായ പിതാവിന് മുഖത്ത് വെട്ടേറ്റു. വെറിബിയിലെ വസതിയിൽ പുലർച്ചെ 1.15 ഓടെയാണ് സംഭവം. ഭാര്യയും ഏഴു വയസ്സുള്ള മകളും വീട്ടിലുണ്ടായിരുന്ന സമയത്താണ് ആയുധങ്ങളുമായി എത്തിയ സംഘം ആക്രമണം നടത്തിയത്.
14-ഉം 15-ഉം വയസ്സുള്ള രണ്ട് ആൺകുട്ടികളാണ് ഗാരേജ് വഴി ബലമായി വീടിനുള്ളിലേക്ക് കടന്നത്. തുടർന്ന് ഗൃഹനാഥനെ ആക്രമിച്ച ഇവർ കാറിന്റെ താക്കോൽ ആവശ്യപ്പെടുകയായിരുന്നു. നിലവിൽ മറ്റ് കേസുകളിൽ ജാമ്യത്തിൽ കഴിയുന്നവരാണ് പിടിയിലായ രണ്ടുപേരും എന്നാണ് വിവരം. ഇതിൽ പതിനഞ്ചുകാരൻ മറ്റൊരു കേസുമായി ബന്ധപ്പെട്ട് സംഭവം നടക്കുന്നതിന് മണിക്കൂറുകൾക്ക് മുമ്പാണ് കോടതിയിൽ ഹാജരായിരുന്നത്.
സംഭവത്തെ തുടർന്ന് രണ്ട് കൗമാരക്കാരെയും പോലീസ് അറസ്റ്റ് ചെയ്തു. അതിക്രമിച്ച് കടക്കൽ, ആക്രമണം, വാഹനം മോഷ്ടിക്കൽ തുടങ്ങിയ കുറ്റങ്ങൾ ചുമത്തിയാണ് ഇവർക്കെതിരെ കേസെടുത്തിരിക്കുന്നത്. പരിക്കേറ്റ പിതാവ് നിലവിൽ ആശുപത്രിയിൽ ചികിത്സയിലാണ്; കുടുംബാംഗങ്ങൾ വലിയ മാനസികാഘാതത്തിലാണ്. ഇതോടെ ഗുരുതരമായ കുറ്റകൃത്യങ്ങളിൽ ഏർപ്പെടുന്ന കൗമാരക്കാർക്ക് മുതിർന്നവർക്കുള്ള കടുത്ത ശിക്ഷ തന്നെ നൽകണമെന്ന (‘അഡൾട്ട് ക്രൈം, അഡൾട്ട് ടൈം’) ആവശ്യവും ചർച്ചകളും രാജ്യത്തുടനീളം വീണ്ടും ശക്തമാവുകയാണ്.
