അഡ്ലെയ്ഡ്: ഓസ്ട്രേലിയയിലെ പ്രാഥമിക ആരോഗ്യപരിചരണ മേഖലയിലെ ഏറ്റവും വലിയ പ്രൊഫഷണൽ സംഘടനയായ റോയൽ ഓസ്ട്രേലിയൻ കോളേജ് ഓഫ് ജനറൽ പ്രാക്ടീഷണേഴ്സിന്റെ (RACGP) പുതിയ പ്രസിഡന്റായി ഇന്ത്യക്കാരിയായ ഡോ. രമ്യ രാമൻ ചുമതലയേറ്റു. 55,000-ത്തിലധികം അംഗങ്ങളെ പ്രതിനിധീകരിക്കുന്ന സംഘടനയുടെ തലപ്പത്തേക്കാണ് ഡോ. രമ്യ രാമൻ എത്തുന്നത്. നവംബർ 19 വ്യാഴാഴ്ച അഡ്ലെയ്ഡിൽ നടന്ന സംഘടനയുടെ വാർഷിക പൊതുയോഗത്തിലാണ് അവർ ഔദ്യോഗികമായി സ്ഥാനമേറ്റത്. രണ്ടുവർഷത്തെ കാലാവധി പൂർത്തിയാക്കിയ ഡോ. മൈക്കൽ റൈറ്റിന്റെ പിൻഗാമിയായാണ് നിയമനം.
സ്പെഷ്യലിസ്റ്റ് ജനറൽ പ്രാക്ടീഷണർ, മെഡിക്കൽ വിദ്യാഭ്യാസ വിദഗ്ധ, അക്കാദമിക്, മെഡിക്കൽ പ്രാക്ടീസ് ഉടമ എന്നീ നിലകളിൽ ശ്രദ്ധേയമായ പ്രവർത്തനപരിചയമുള്ള വ്യക്തിയാണ് ഡോ. രമ്യ രാമൻ. നേരത്തെ RACGP വൈസ് പ്രസിഡന്റായും വെസ്റ്റേൺ ഓസ്ട്രേലിയൻ വിഭാഗത്തിന്റെ ചെയർപേഴ്സണായും അവർ പ്രവർത്തിച്ചിട്ടുണ്ട്. കഴിഞ്ഞ ഓഗസ്റ്റിലാണ് പ്രസിഡന്റായി തെരഞ്ഞെടുക്കപ്പെട്ട വിവരം ഔദ്യോഗികമായി പ്രഖ്യാപിച്ചത്.
ഓസ്ട്രേലിയൻ ആരോഗ്യസംവിധാനത്തിന്റെ അടിത്തറയാണ് ജനറൽ പ്രാക്ടീസ് മേഖലയെന്ന് ചുമതലയേറ്റ ശേഷം ഡോ. രമ്യ രാമൻ പറഞ്ഞു. രാജ്യത്തെമ്പാടുമുള്ള ജിപിമാരുടെ പ്രവർത്തനങ്ങൾക്ക് ആവശ്യമായ അംഗീകാരവും സുസ്ഥിരമായ സാമ്പത്തിക പിന്തുണയും ഉറപ്പാക്കുന്നതിനാണ് തന്റെ മുൻഗണനയെന്നും അവർ വ്യക്തമാക്കി. ജനറൽ പ്രാക്ടീഷണർമാരുടെ തൊഴിൽശക്തി ശക്തിപ്പെടുത്തുക, ആരോഗ്യപരിചരണ സേവനങ്ങൾ എല്ലാവർക്കും കൂടുതൽ എളുപ്പത്തിൽ ലഭ്യമാക്കുക, പ്രത്യേകിച്ച് ഡോക്ടർമാരുടെ കുറവ് നേരിടുന്ന പ്രദേശങ്ങളിലെ ആരോഗ്യസംവിധാനം മെച്ചപ്പെടുത്തുക എന്നിവയും പുതിയ പ്രസിഡന്റിന്റെ പ്രധാന ലക്ഷ്യങ്ങളാണ്.
മുൻ പ്രസിഡന്റ് ഡോ. മൈക്കൽ റൈറ്റിന്റെ നേതൃത്വത്തിൽ ഗ്രാമീണ ആരോഗ്യപരിചരണം, മെഡിക്കൽ പരിശീലനം, വനിതാ ആരോഗ്യം, ബൾക്ക് ബില്ലിംഗ് പ്രോത്സാഹനം തുടങ്ങിയ മേഖലകളിൽ വിവിധ പദ്ധതികൾ നടപ്പാക്കി സംഘടന നിരവധി നേട്ടങ്ങൾ കൈവരിച്ചിരുന്നു. 55,000-ത്തിലധികം അംഗങ്ങളുള്ള RACGP-യുടെ പുതിയ നേതൃത്വത്തിലേക്ക് ഡോ. രമ്യ രാമൻ എത്തുന്നത് ഓസ്ട്രേലിയയിലെ പ്രാഥമിക ആരോഗ്യപരിചരണ മേഖലയിലെ സുപ്രധാന മാറ്റമായാണ് വിലയിരുത്തപ്പെടുന്നത്.

