ന്യൂഡൽഹി: ജപ്പാനിലെ ടകേദ ഫാർമസ്യൂട്ടിക്കൽസ് വികസിപ്പിച്ച ഡെങ്കിപ്പനി വാക്സീനായ ക്യൂഡെങ്ക (Qdenga/TAK-003)യ്ക്ക് ഇന്ത്യയുടെ ഡ്രഗ് കൺട്രോളർ ജനറൽ (DCGI) വിപണനാനുമതി നൽകി. രാജ്യത്ത് ഡെങ്കിപ്പനി പ്രതിരോധത്തിനായി അംഗീകാരം ലഭിക്കുന്ന ആദ്യ വാക്സീനാണിത്.
4 മുതൽ 60 വയസ്സുവരെയുള്ളവർക്ക് വാക്സീൻ നൽകാനാണ് അനുമതി. മൂന്ന് മാസത്തെ ഇടവേളയിൽ രണ്ട് ഡോസുകളായാണ് ഇത് നൽകുക. മുമ്പ് ഡെങ്കിപ്പനി ബാധിച്ചിട്ടുണ്ടോയെന്ന് പരിശോധന നടത്താതെ തന്നെ വാക്സീൻ സ്വീകരിക്കാമെന്നതാണ് ഇതിന്റെ പ്രത്യേകത. നാല് ഡെങ്കി വൈറസ് വകഭേദങ്ങൾക്കെതിരെയും സംരക്ഷണം നൽകുന്നതിനാണ് ക്യൂഡെങ്ക രൂപകൽപ്പന ചെയ്തിരിക്കുന്നത്.
ക്ലിനിക്കൽ പരീക്ഷണങ്ങളിൽ സ്ഥിരീകരിച്ച ഡെങ്കിപ്പനിക്കെതിരെ 80 ശതമാനത്തിലധികം ഫലപ്രാപ്തിയും ഡെങ്കിയുമായി ബന്ധപ്പെട്ട ആശുപത്രി പ്രവേശനം തടയുന്നതിൽ 90 ശതമാനത്തിലധികം ഫലപ്രാപ്തിയും വാക്സീൻ പ്രകടിപ്പിച്ചതായി കമ്പനി അറിയിച്ചു. ഇന്ത്യയിൽ സ്വകാര്യ ആരോഗ്യരംഗത്ത് 2027-ന്റെ ആദ്യപകുതിയോടെ വാക്സീൻ ലഭ്യമാക്കാനാണ് ടകേദയുടെ പദ്ധതി.
