മുൻ പരമോന്നത നേതാവ് അലി ഖമേനിയുടെ സംസ്ഥാന ബഹുമതികളോടെയുള്ള സംസ്കാരച്ചടങ്ങ് വീണ്ടും മാറ്റിവെച്ചതായി ഇറാൻ അറിയിച്ചു. ഈ മാസം അവസാനമോ ജൂലൈ ആദ്യമോ ആയിരിക്കും ചടങ്ങുകൾ നടക്കുകയെന്നാണ് ടെഹ്റാൻ മേയർ അലിറേസ സകാനി അറിയിച്ചത്.
ആദ്യഘട്ടത്തിൽ മാർച്ചിൽ നടത്താനിരുന്ന സംസ്കാരം പശ്ചിമേഷ്യൻ യുദ്ധസാഹചര്യത്തെ തുടർന്ന് മാറ്റിവെച്ചിരുന്നു. പിന്നീട് ജൂൺ മധ്യത്തിൽ മൂന്ന് ദിവസത്തെ പൊതുശ്രദ്ധാഞ്ജലി ചടങ്ങുകൾ നടത്താനാണ് പദ്ധതി പ്രഖ്യാപിച്ചിരുന്നത്. എന്നാൽ മുഹറം മാസത്തിലെ ആദ്യ പത്ത് ദിവസങ്ങളിലെ മതാചരണങ്ങൾ കണക്കിലെടുത്താണ് വീണ്ടും തീയതി മാറ്റിയതെന്ന് അധികൃതർ വിശദീകരിച്ചു.
ടെഹ്റാൻ, ഖോം, മഷ്ഹദ് എന്നിവിടങ്ങളിലായി ചടങ്ങുകൾ സംഘടിപ്പിക്കാനാണ് പദ്ധതി. ഖമേനിയെ മഷ്ഹദിൽ സംസ്കരിക്കുമെന്നും ചടങ്ങുകളിൽ രണ്ട് കോടിയോളം ആളുകൾ പങ്കെടുക്കുമെന്നാണ് ഇറാൻ പ്രതീക്ഷിക്കുന്നത്. അന്തിമ തീയതി പിന്നീട് ഔദ്യോഗികമായി പ്രഖ്യാപിക്കുമെന്ന് അധികൃതർ അറിയിച്ചു.
