കൊച്ചി: നഗരത്തെ നടുക്കി കൊച്ചി തേവര പാലത്തിൽ നിയന്ത്രണം വിട്ട ലോറി അപകടത്തിൽപെട്ടു. പാലത്തിന്റെ കൈവരികൾ തകർത്ത് ലോറിയുടെ മുൻഭാഗം താഴേക്ക് തൂങ്ങിനിൽക്കുന്ന ഭീതിജനകമായ അവസ്ഥയിലാണുളളത്. അപകടം നടക്കുന്ന സമയത്ത് ലോറിയിൽ ഡ്രൈവർ മാത്രമാണ് ഉണ്ടായിരുന്നത്. ലോറി പാലത്തിൽ നിന്നും താഴേക്ക് മറിയുന്നതിന് തൊട്ടുമുമ്പ് ഡ്രൈവർ പുറത്തേക്ക് ചാടി രക്ഷപ്പെട്ടതിനാൽ വൻ ദുരന്തം ഒഴിവായി.
ഇന്ന് പുലർച്ചെയോടെയായിരുന്നു നാടിനെ വിറപ്പിച്ച അപകടം സംഭവിച്ചത്. നിയന്ത്രണം നഷ്ടമായ വാഹനം പാലത്തിന്റെ സംരക്ഷണ ഭിത്തിയും കൈവരികളും ശക്തമായി ഇടിച്ച് തകർക്കുകയായിരുന്നു. ഇടിയുടെ ആഘാതത്തിൽ വാഹനത്തിന്റെ പകുതിയോളം ഭാഗം പാലത്തിന് പുറത്തേക്ക് തൂങ്ങിനിന്നു. വലിയൊരു ശബ്ദം കേട്ട് ഓടിക്കൂടിയ നാട്ടുകാരും മറ്റ് യാത്രക്കാരുമാണ് പോലീസിനെയും ഫയർഫോഴ്സിനെയും വിവരമറിയിച്ചത്.
അപകടത്തെ തുടർന്ന് തേവര പാലത്തിലൂടെയുള്ള ഗതാഗതം പൂർണ്ണമായും തടസ്സപ്പെട്ടു. റോഡിന് കുറുകെയും പാലത്തിന് പുറത്തേക്കുമായി അപകടകരമായ രീതിയിൽ കിടക്കുന്ന ലോറി മാറ്റുന്നതിനായി ഫയർഫോഴ്സും പോലീസും ചേർന്ന് നിലവിൽ ക്രെയിൻ ഉപയോഗിച്ചുള്ള രക്ഷാപ്രവർത്തനം നടത്തിവരികയാണ്. വാഹനം മാറ്റിയതിന് ശേഷം മാത്രമേ ഈ വഴിയിലുള്ള ഗതാഗതം പുനഃസ്ഥാപിക്കാൻ സാധിക്കൂ എന്ന് അധികൃതർ അറിയിച്ചു.
