വാഷിങ്ടൺ: വെനസ്വേലയുമായി വൻ എണ്ണക്കരാറിൽ ധാരണയിലെത്തിയതായി യുഎസ് പ്രസിഡന്റ് ഡോണൾഡ് ട്രംപ്. ഇടപാടിനെ ‘ലോകചരിത്രത്തിലെ ഏറ്റവും വലിയ എണ്ണക്കരാർ’ എന്നാണ് ട്രംപ് വിശേഷിപ്പിച്ചത്. വെനസ്വേലയുടെ എണ്ണമേഖലയിൽ അമേരിക്കൻ കമ്പനികൾക്ക് പ്രധാന നിയന്ത്രണം ലഭിക്കുന്ന തരത്തിലാണ് കരാർ.
വെനസ്വേലയുടെ 17 പ്രധാന എണ്ണപ്പാടങ്ങൾ വികസിപ്പിക്കുന്നതിനാണ് പദ്ധതി. 100 ബില്യൺ ഡോളറിലധികം സ്വകാര്യ നിക്ഷേപം ആകർഷിക്കാനും രാജ്യത്തിന് വലിയ തോതിൽ നികുതി വരുമാനം ലഭിക്കാനും കരാർ സഹായിക്കുമെന്ന് വെനസ്വേലൻ ഇടക്കാല പ്രസിഡന്റ് ഡെൽസി റോഡ്രിഗസ് പറഞ്ഞു.
അമേരിക്കയ്ക്ക് ഏകദേശം 55 ശതമാനം പ്രവർത്തനനിയന്ത്രണം ലഭിക്കുമെന്നാണ് റിപ്പോർട്ടുകൾ. വെനസ്വേലൻ എണ്ണയുടെ ഒരു ഭാഗം അമേരിക്കയ്ക്ക് മുൻഗണനയോടെ ലഭ്യമാക്കുകയും യുഎസിലെ ഇന്ധനവില കുറയ്ക്കാൻ ഇത് സഹായിക്കുമെന്നുമാണ് ട്രംപ് ഭരണകൂടത്തിന്റെ പ്രതീക്ഷ.
അതേസമയം, കരാറിനെതിരെ വിമർശനവും ഉയർന്നിട്ടുണ്ട്. വെനസ്വേലയുടെ പ്രകൃതിവിഭവങ്ങളിൽ അമേരിക്കൻ നിയന്ത്രണം വർധിപ്പിക്കുന്നതും രാജ്യത്തിന്റെ പരമാധികാരത്തെ ബാധിക്കുന്നതുമാണ് ഇടപാടെന്ന് വിമർശകർ ആരോപിച്ചു. ഇടക്കാല സർക്കാരിന് ഇത്രയും ദീർഘകാല പ്രതിബദ്ധതയുള്ള കരാറിൽ ഏർപ്പെടാനുള്ള നിയമപരമായ അധികാരമുണ്ടോ എന്ന ചോദ്യവും ഉയർന്നിട്ടുണ്ട്.
വർഷങ്ങളായുള്ള നിക്ഷേപക്കുറവും അടിസ്ഥാനസൗകര്യങ്ങളുടെ തകർച്ചയും കാരണം വെനസ്വേലയുടെ എണ്ണമേഖല പ്രതിസന്ധിയിലാണ്. അതിനാൽ വൻതോതിലുള്ള നിക്ഷേപവും അടിസ്ഥാനസൗകര്യ വികസനവും കൂടാതെ ഉൽപ്പാദനം ഉടൻ വർധിപ്പിക്കാൻ കഴിയില്ലെന്നാണ് വിലയിരുത്തൽ.
