പെർത്ത്: പടിഞ്ഞാറൻ ഓസ്ട്രേലിയയുടെ തെക്കുപടിഞ്ഞാറൻ മേഖലയിൽ കാൽനടയാത്രയ്ക്കിടെ വനത്തിൽ കാണാതായ 87 വയസ്സുകാരിയെ സുരക്ഷിതമായി കണ്ടെത്തി. കൊടും തണുപ്പിനെ അതിജീവിച്ച് 12 മണിക്കൂറിലധികം കാടിനുള്ളിൽ കഴിഞ്ഞ വയോധികയെ ശനിയാഴ്ച ഉച്ചയോടെയാണ് രക്ഷാപ്രവർത്തകർ കണ്ടെത്തിയത്. കൈവശമുണ്ടായിരുന്ന ഒരു പാക്കറ്റ് ഉണക്കമുന്തിരി കൃത്യമായി മിതപ്പെടുത്തി കഴിച്ചാണ് ഇവർ വിശപ്പിനെ പ്രതിരോധിച്ചത്.
പെർത്തിൽ നിന്ന് ഏകദേശം 280 കിലോമീറ്റർ തെക്ക് മാറി ഡോണെല്ലി റിവർ വില്ലേജ് (Donnelly River Village) മേഖലയിൽ വെള്ളിയാഴ്ചയാണ് സംഭവം നടന്നത്. വൈകുന്നേരമായിട്ടും ഇവർ തിരികെ എത്താതിരുന്നതിനെ തുടർന്ന് രാത്രി എട്ട് മണിയോടെ പോലീസിൽ വിവരമറിയിക്കുകയായിരുന്നു. തുടർന്ന് പോലീസിന്റെ നേതൃത്വത്തിൽ വലിയ തോതിലുള്ള തിരച്ചിൽ ആരംഭിച്ചു.
ശനിയാഴ്ച ഉച്ചയ്ക്ക് ശേഷം ജനവാസമില്ലാത്ത കുറ്റിക്കാടുകൾക്കിടയിൽ നിന്നുമാണ് ഇവരെ കണ്ടെത്തിയത്. കണ്ടെത്തുമ്പോൾ ഇവർ അങ്ങേയറ്റം തളർന്ന നിലയിലും നിർജ്ജലീകരണം സംഭവിച്ച അവസ്ഥയിലുമായിരുന്നു. എങ്കിലും ശരീരത്തിൽ മറ്റ് പരിക്കുകളൊന്നുമില്ലെന്ന് പരിശോധനയിൽ വ്യക്തമായി. ഒറ്റപ്പെട്ടയിടങ്ങളിലേക്കും വനമേഖലകളിലേക്കും പോകുന്നവർ ആവശ്യമായ മുൻകരുതലുകൾ എടുക്കണമെന്നും ഭക്ഷണവും വെള്ളവും കരുതണമെന്നും ഈ സംഭവത്തെ മുൻനിർത്തി പോലീസ് ജനങ്ങൾക്ക് മുന്നറിയിപ്പ് നൽകി.
