മെൽബൺ: ഓസ്ട്രേലിയയിലെ വിക്ടോറിയൻ സംസ്ഥാനത്തെ റോഡുകളുടെ തകർച്ച ജീവനെടുക്കുന്ന ഘട്ടത്തിലേക്ക്. വെസ്റ്റേൺ ഹൈവേയിൽ ട്രാവല്ലയ്ക്ക് സമീപം റോഡിലെ കുഴിയിൽ വീണ് ബല്ലാററ്റ് സ്വദേശിയായ 71-കാരൻ മരിച്ചു. ഇതോടെ സംസ്ഥാനത്തെ റോഡുകളുടെ മോശം അവസ്ഥയെക്കുറിച്ചുള്ള പൊതുജന രോഷവും രാഷ്ട്രീയ ചർച്ചകളും കൂടുതൽ ശക്തമായിരിക്കുകയാണ്.
വിക്ടോറിയയിലെ ആകെ റോഡ് ശൃംഖലയുടെ പകുതിയോളം ഭാഗം അതീവ ശോച്യാവസ്ഥയിലാണെന്നും, അറ്റകുറ്റപ്പണികൾ നടക്കുന്നതിനേക്കാൾ വേഗത്തിൽ പുതിയ കുഴികളും തകരാറുകളും രൂപപ്പെടുന്നുണ്ടെന്നും വ്യക്തമാക്കുന്ന ഓഡിറ്റർ ജനറലിന്റെ റിപ്പോർട്ട് പുറത്തുവന്ന് ദിവസങ്ങൾക്കുള്ളിലാണ് ഈ ദാരുണ അപകടം സംഭവിച്ചിരിക്കുന്നത്.
വിക്ടോറിയയിലെ റോഡുകൾ തൃപ്തികരമായ അവസ്ഥയിലല്ലെന്ന് സംസ്ഥാന പ്രീമിയർ ബെൻ കരോൾ നേരത്തെ തുറന്നുസമ്മതിച്ചിരുന്നു. റോഡുകളുടെ അടിയന്തര പുനരുദ്ധാരണത്തിനായി ദശലക്ഷക്കണക്കിന് ഡോളറിന്റെ അധിക ഫണ്ടും സർക്കാർ പ്രഖ്യാപിച്ചിരുന്നുവെങ്കിലും, അപകടങ്ങൾ തുടർക്കഥയാകുന്നത് വലിയ പ്രതിഷേധത്തിന് വഴിവെക്കുകയാണ്.
