കാൻബറ: കൃത്യനിർവഹണത്തിനിടെ ജീവൻ ബലി നൽകേണ്ടി വന്ന ധീരരായ പോലീസ് ഉദ്യോഗസ്ഥർക്ക് ആദരമർപ്പിച്ച് ഓസ്ട്രേലിയൻ തലസ്ഥാനമായ കാൻബറയിലേക്ക് വൻ ബൈക്ക് റാലി. മുൻകാല-നിലവിലെ പോലീസ് ഉദ്യോഗസ്ഥരും അവരുടെ കുടുംബാംഗങ്ങളും പൊതുജനങ്ങളും ഒത്തുചേർന്ന് നടത്തിയ ‘വാൾ ടു വാൾ റൈഡ് ഫോർ റിമംബറൻസ്’ (Wall to Wall Ride for Remembrance) ശ്രദ്ധേയമായി.
ഓസ്ട്രേലിയൻ ഫെഡറൽ പോലീസ് (എ.എഫ്.പി) ഉൾപ്പെടെ രാജ്യത്തുടനീളമുള്ള വിവിധ പോലീസ് ഏജൻസികളെ പ്രതിനിധീകരിച്ച് നൂറുകണക്കിന് റൈഡർമാരാണ് ഈ സ്മരണാ യാത്രയിൽ പങ്കാളികളായത്. കാൻബറയിലെ നാഷണൽ പോലീസ് മെമ്മോറിയലിൽ എത്തിച്ചേർന്നതോടെയാണ് റാലി സമാപിച്ചത്.
സെപ്റ്റംബർ 29-ന് നടക്കുന്ന ദേശീയ പോലീസ് അനുസ്മരണ ദിനത്തിൽ (National Police Remembrance Day) ഓസ്ട്രേലിയ വീണ്ടും ധീരരായ ഉദ്യോഗസ്ഥരുടെ ത്യാഗത്തെ അനുസ്മരിക്കും. രാജ്യത്തിന് വേണ്ടി ജീവൻ വെടിഞ്ഞവരുടെ സേവനത്തെയും സമർപ്പണത്തെയും കൃതജ്ഞതയോടെ ഓർക്കുകയും, അവരുടെ വേർപാടിൽ നീറുന്ന കുടുംബങ്ങൾക്ക് ഐക്യദാർഢ്യം പ്രഖ്യാപിക്കുകയും ചെയ്യുന്നതാണ് ഈ ദിനാചരണം.
