കാൻബറ: ക്യാപിറ്റൽ ഗെയിൻസ് ടാക്സ് പരിഷ്കാരങ്ങൾ മൂലം ബുദ്ധിമുട്ടുന്ന ഓസ്ട്രേലിയക്കാരെ ന്യൂസിലൻഡിലേക്ക് ക്ഷണിച്ച് ന്യൂസിലൻഡ് ധനമന്ത്രി നിക്കോള വില്ലിസ്. ഓസ്ട്രേലിയയിൽ വരാനിരിക്കുന്ന നികുതി വർദ്ധനവിനെത്തുടർന്ന്, ബിസിനസ്സുകാർക്കും നിക്ഷേപകർക്കും കൂടുതൽ അനുകൂലമായ ന്യൂസിലൻഡിലെ നികുതി ക്രമീകരണങ്ങൾ പ്രയോജനപ്പെടുത്താൻ അവർ പരസ്യമായ ക്ഷണം നൽകി.
സ്കൈ ന്യൂസിലൂടെ സംസാരിച്ച വില്ലിസ്, ന്യൂസിലൻഡിൽ വിപുലമായ ക്യാപിറ്റൽ ഗെയിൻസ് ടാക്സ് നിലവിലില്ലെന്ന് ചൂണ്ടിക്കാട്ടി. ന്യൂസിലൻഡിന്റെ നികുതി സമ്പ്രദായം ലളിതവും, വിപുലമായ അടിത്തറയുള്ളതും, കുറഞ്ഞ നിരക്കുള്ളതുമാണെന്ന് അവർ വിശേഷിപ്പിച്ചു. ബിസിനസ്സുടമകൾക്കും നിക്ഷേപകർക്കും ഇത് ഏറെ സൗകര്യപ്രദമാണെന്നും അവർ കൂട്ടിച്ചേർത്തു.
ഓസ്ട്രേലിയയുടെ പുതിയ ഫെഡറൽ ബഡ്ജറ്റിൽ, നിലവിലുള്ള 50 ശതമാനം ക്യാപിറ്റൽ ഗെയിൻസ് ടാക്സ് ഡിസ്കൗണ്ട് 2027 ജൂലൈ മുതൽ വിലക്കയറ്റത്തിനനുസരിച്ച് ക്രമീകരിക്കുന്ന മാതൃകയിലേക്ക് മാറ്റുമെന്ന് പ്രഖ്യാപിച്ചിരുന്നു. പുതിയ ഘടനയിൽ നിക്ഷേപകർ ക്യാപിറ്റൽ ഗെയിൻസിന് കുറഞ്ഞത് 30 ശതമാനം നികുതി നൽകേണ്ടി വരും. ഈ പശ്ചാത്തലത്തിലാണ് വില്ലിസ് ഓസ്ട്രേലിയക്കാരെ ന്യൂസിലൻഡിലേക്ക് ക്ഷണിച്ചത്.
അതേസമയം, ന്യൂസിലൻഡിലെ രാഷ്ട്രീയ സാഹചര്യവും ക്യാപിറ്റൽ ഗെയിൻസ് ടാക്സ് വിഷയത്തിൽ സജീവമാണ്. നവംബർ 7-ന് നടക്കുന്ന തിരഞ്ഞെടുപ്പിന് മുന്നോടിയായി ലേബർ പാർട്ടി വിപുലമായ ക്യാപിറ്റൽ ഗെയിൻസ് ടാക്സ് നടപ്പിലാക്കാൻ പദ്ധതിയിടുന്നുണ്ട്. എന്നാൽ നിലവിലെ സഖ്യ സർക്കാർ ഇതിനെ ശക്തമായി എതിർക്കുന്നുണ്ട്.
നിലവിൽ ന്യൂസിലൻഡിൽ ക്യാപിറ്റൽ ഗെയിൻസ് ടാക്സിന് തുല്യമായി, വാങ്ങി രണ്ട് വർഷത്തിനുള്ളിൽ വിൽക്കുന്ന പ്രോപ്പർട്ടികളിൽ നിന്നുള്ള ലാഭത്തിന് നികുതി ചുമത്തുന്ന ‘ബ്രൈറ്റ് ലൈൻ പ്രോപ്പർട്ടി റൂൾ’ (bright-line property rule) നിലവിലുണ്ട്.
