ന്യൂഡൽഹി: വെനസ്വേലയിൽ ദുരൂഹസാഹചര്യത്തിൽ മരിച്ച ഇന്ത്യൻ നാവികൻ രാകേഷ് ചൗഹാന്റെ മൃതദേഹത്തിൽ പ്രധാന ആന്തരിക അവയവങ്ങൾ ഇല്ലാതിരുന്ന സംഭവത്തിൽ ഭർത്താവ് കൊല്ലപ്പെട്ടതാണെന്ന സംശയം ഭാര്യ ഉന്നയിച്ചു. സംഭവത്തിൽ സമഗ്ര അന്വേഷണം നടത്തി കുറ്റക്കാർക്കെതിരെ നടപടി സ്വീകരിക്കണമെന്ന് അവർ ആവശ്യപ്പെട്ടു.
ഉത്തർപ്രദേശിലെ ദിയോറിയ സ്വദേശിയായ രാകേഷ് ചൗഹാൻ മർച്ചന്റ് നേവിയിൽ ജോലി ചെയ്യുന്നതിനിടെയാണ് വെനസ്വേലയിൽ മരിച്ചത്. കപ്പലിൽ നിന്ന് വീണ് പരിക്കേറ്റതിനെ തുടർന്ന് ചികിത്സയ്ക്കിടെ ഹൃദയാഘാതം മൂലമാണ് മരിച്ചതെന്നായിരുന്നു കമ്പനി കുടുംബത്തെ അറിയിച്ചത്. എന്നാൽ ഇന്ത്യയിൽ നടത്തിയ പോസ്റ്റ്മോർട്ടത്തിൽ മസ്തിഷ്കം, ഹൃദയം, ശ്വാസകോശം, കരൾ, വൃക്കകൾ, കുടൽ ഉൾപ്പെടെ നിരവധി ആന്തരിക അവയവങ്ങൾ കാണാനില്ലെന്ന് കണ്ടെത്തിയതായി റിപ്പോർട്ടിൽ പറയുന്നു. ഇതുമൂലം മരണകാരണം നിർണയിക്കാനായില്ലെന്നും റിപ്പോർട്ടിൽ വ്യക്തമാക്കുന്നു.
ഭർത്താവിന്റെ മരണം സംബന്ധിച്ച യഥാർഥ വിവരങ്ങൾ കമ്പനി മറച്ചുവെച്ചെന്നും മൃതദേഹം വിദേശത്ത് പോസ്റ്റ്മോർട്ടം നടത്തിയ വിവരം പോലും അറിയിച്ചിരുന്നില്ലെന്നും ഭാര്യ ആരോപിച്ചു. സംഭവത്തിൽ കേന്ദ്രസർക്കാരും വിദേശകാര്യ മന്ത്രാലയവും അടിയന്തരമായി ഇടപെട്ട് സത്യം പുറത്തുകൊണ്ടുവരണമെന്നും അവർ ആവശ്യപ്പെട്ടു.
സംഭവത്തിൽ സ്വതന്ത്ര അന്വേഷണം നടത്തണമെന്ന് Federation of Seafarers’ Unions of Indiaയും ആവശ്യപ്പെട്ടിട്ടുണ്ട്. മൃതദേഹത്തോടൊപ്പം വിദേശ പോസ്റ്റ്മോർട്ടം റിപ്പോർട്ട് കൈമാറാതിരുന്നതും സംഭവത്തിൽ ദുരൂഹത വർധിപ്പിക്കുന്നതായി സംഘടന ചൂണ്ടിക്കാട്ടി.
