ന്യൂഡൽഹി: വടക്കൻ അറബിക്കടലിലെ അന്താരാഷ്ട്ര സമുദ്രപരിധിയിൽ പാകിസ്ഥാൻ നാവികസേനയുടെ കപ്പൽ ഇന്ത്യൻ നാവികസേനയുടെ കപ്പലിൽ ഇടിച്ചതിനെ തുടർന്ന് പാകിസ്ഥാൻ നയതന്ത്ര പ്രതിനിധിയെ വിളിച്ചുവരുത്തി ഇന്ത്യ. സെപ്റ്റംബർ 15നാണ് സംഭവം നടന്നത്. പതിവ് നിരീക്ഷണ ദൗത്യത്തിലായിരുന്ന ഇന്ത്യൻ നാവികസേനാ കപ്പലിന് സമീപത്തേക്ക് പാക് നാവിക കപ്പൽ എത്തിയതിനെ തുടർന്നാണ് കൂട്ടിയിടിയുണ്ടായതെന്ന് ഇന്ത്യൻ വിദേശകാര്യ മന്ത്രാലയം അറിയിച്ചു.
സംഭവത്തിൽ വലിയ നാശനഷ്ടങ്ങളൊന്നും റിപ്പോർട്ട് ചെയ്തിട്ടില്ല. പാക് നാവിക യൂണിറ്റിന്റെ കടലിലെ പെരുമാറ്റം “സ്വീകാര്യമല്ലാത്തതും പ്രൊഫഷണൽ അല്ലാത്തതുമാണെന്ന്” ഇന്ത്യ വിലയിരുത്തി. ഇരു രാജ്യങ്ങളുടെയും സൈനിക യൂണിറ്റുകൾ കടലിൽ ആവശ്യമായ ജാഗ്രത പാലിക്കണമെന്നും ബന്ധപ്പെട്ട ഉഭയകക്ഷി കരാറുകളിലെ വ്യവസ്ഥകൾ മാനിക്കണമെന്നും പാകിസ്ഥാൻ പ്രതിനിധിയോട് ഇന്ത്യ ആവശ്യപ്പെട്ടു.
സെപ്റ്റംബർ 16ന് പാകിസ്ഥാൻ ഹൈക്കമ്മിഷനിലെ ചാർജ് ഡി അഫയേഴ്സ് സാദ് അഹമ്മദ് വരൈച്ചിനെയാണ് ന്യൂഡൽഹിയിലെ വിദേശകാര്യ മന്ത്രാലയം വിളിച്ചുവരുത്തിയത്. സംഭവത്തിൽ ശക്തമായ പ്രതിഷേധം രേഖപ്പെടുത്തി. അതേസമയം, ഇസ്ലാമാബാദിലുള്ള ഇന്ത്യൻ ചാർജ് ഡി അഫയേഴ്സിനും പാകിസ്ഥാൻ വിദേശകാര്യ മന്ത്രാലയത്തിൽ സമാനമായ പ്രതിഷേധം അറിയിക്കാൻ നിർദേശം നൽകിയിട്ടുണ്ട്.
1991 ഏപ്രിലിൽ ഇന്ത്യയും പാകിസ്ഥാനും ഒപ്പുവച്ച സൈനിക അഭ്യാസങ്ങൾ, നീക്കങ്ങൾ, സൈനികരുടെ നീക്കം എന്നിവ സംബന്ധിച്ച മുൻകൂർ അറിയിപ്പ് കരാറിലെ ആർട്ടിക്കിൾ 10 ലംഘിക്കുന്നതാണ് പാക് നാവിക യൂണിറ്റിന്റെ നടപടിയെന്നും ഇന്ത്യ വ്യക്തമാക്കി.
സംഭവത്തെക്കുറിച്ച് പാകിസ്ഥാന്റെ ഭാഗത്തുനിന്നുള്ള വിശദമായ പ്രതികരണം ഇതുവരെ പുറത്തുവന്നിട്ടില്ല.
