ലണ്ടൻ: ഓസ്ട്രേലിയൻ വൺ നേഷൻ പാർട്ടി നേതാവും സെനറ്ററുമായ പോളിൻ ഹാൻസൺ യുകെയിൽ വെച്ച് പ്രമുഖ തീവ്രവലതുപക്ഷ പ്രവർത്തകൻ ടോമി റോബിൻസണുമായി നടത്തിയ പോഡ്കാസ്റ്റ് അഭിമുഖം വലിയ വിവാദങ്ങൾക്ക് വഴിവെക്കുന്നു. മുസ്ലിംകൾ, കുടിയേറ്റക്കാർ, കോവിഡ് വാക്സിൻ എന്നിവയ്ക്കെതിരെ കടുത്ത ഭാഷയിലാണ് ഹാൻസൺ അഭിമുഖത്തിൽ സംസാരിച്ചത്. ഓസ്ട്രേലിയയിലെ ദേശീയ ഭിന്നശേഷി ഇൻഷുറൻസ് പദ്ധതി (NDIS) മുസ്ലിം ഭൂരിപക്ഷ പ്രദേശങ്ങളിൽ ഉള്ളവർ വ്യാപകമായി ദുരുപയോഗം ചെയ്യുന്നുവെന്ന ഹാൻസന്റെ ആരോപണം വലിയ പ്രതിഷേധങ്ങൾക്ക് കാരണമായിട്ടുണ്ട്.
താൻ കോവിഡ് വാക്സിൻ സ്വീകരിച്ചിട്ടില്ലെന്നും 10 മുതൽ 18 വർഷം വരെ പരീക്ഷണങ്ങൾ നടത്താതെ ഇത്തരം വാക്സിനുകൾ പൊതുജനങ്ങൾക്ക് നൽകരുതായിരുന്നുവെന്നും ഹാൻസൺ പറഞ്ഞു. കൂടാതെ, ഓസ്ട്രേലിയയിലെ പഴയ ‘വൈറ്റ് ഓസ്ട്രേലിയ’ നയം അവസാനിപ്പിച്ചതാണ് ആഫ്രിക്കൻ, പാകിസ്താൻ കുടിയേറ്റക്കാരുടെ വർദ്ധനവിന് കാരണമായതെന്നും അവർ ആരോപിച്ചു. തന്റെ മകൾ ലീ ഭാവിയിൽ പാർട്ടിയെ നയിക്കാൻ യോഗ്യയാണെങ്കിലും കുടുംബവാഴ്ചയോട് തനിക്ക് താല്പര്യമില്ലെന്നും അവർ വ്യക്തമാക്കി.
എന്നാൽ, ഹാൻസന്റെ ആരോപണങ്ങളെ തള്ളിക്കൊണ്ട് ഓസ്ട്രേലിയൻ ആരോഗ്യം-എൻ.ഡി.ഐ.എസ് മന്ത്രി മാർക്ക് ബട്ലർ രംഗത്തെത്തി. ഭിന്നശേഷി പദ്ധതിയിലുള്ളവരുടെ മതമോ ദേശീയതയോ തിരിച്ചുള്ള കണക്കുകൾ നിലവിലില്ലെന്നും ഹാൻസൺ ഉന്നയിക്കുന്ന കണക്കുകൾ വ്യാജമാണെന്നും അദ്ദേഹം വ്യക്തമാക്കി. ഓസ്ട്രേലിയൻ ജനത കടുത്ത സാമ്പത്തിക പ്രതിസന്ധി നേരിടുമ്പോൾ ഹാൻസൺ എന്തിനാണ് യൂറോപ്പിലേക്ക് യാത്ര ചെയ്തതെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു. ഹാൻസന്റെ നടപടി അങ്ങേയറ്റം അപകീർത്തികരമാണെന്നും അവർ രാജ്യത്തോട് മാപ്പ് പറയണമെന്നും ഗ്രീൻസ് സെനറ്റർ സാറ ഹാൻസൺ-യങ് ആവശ്യപ്പെട്ടു.
