പത്തനംതിട്ട: മദ്യവേട്ടയ്ക്കിറങ്ങിയ സംഘത്തിലെ പോലീസുകാർ മദ്യപിച്ച് ലക്കുകെട്ട് പോലീസ് ജീപ്പോടിച്ച് അപകടമുണ്ടാക്കിയ സംഭവത്തിൽ മൂന്ന് ഉദ്യോഗസ്ഥരെ സസ്പെൻഡ് ചെയ്തു. പത്തനംതിട്ട ഡിവൈഎസ്പിക്കു കീഴിലുള്ള ഡാൻസാഫ് (DANSAF) ടീമിലെ രാഹുല്, പ്രിയേഷ്, സുമൻ എന്നിവർക്കെതിരെയാണ് ജില്ലാ പോലീസ് മേധാവി സസ്പെൻഷൻ നടപടിയെടുത്തത്. ചൊവ്വാഴ്ച വൈകുന്നേരമാണ് നാടകീയമായ സംഭവങ്ങൾ അരങ്ങേറിയത്.
മദ്യലഹരിയിലായിരുന്ന ഉദ്യോഗസ്ഥർ സഞ്ചരിച്ച പോലീസ് വാഹനം നിയന്ത്രണം വിട്ട് റോഡിലൂടെ അപകടകരമായ രീതിയിൽ പായുകയായിരുന്നു. നിയന്ത്രണം നഷ്ടമായ ജീപ്പ് ഇടിച്ച് വലിയൊരു അപകടമുണ്ടാകുന്നതിൽ നിന്ന് റോഡിലുണ്ടായിരുന്ന ശോഭ എന്ന വനിതാ ഓട്ടോ ഡ്രൈവർ തലനാരിഴയ്ക്കാണ് രക്ഷപ്പെട്ടത്.
അപകടകരമായ രീതിയിൽ മുന്നോട്ട് പോയ പോലീസ് ജീപ്പ് ഒടുവിൽ നാട്ടുകാർ ചേർന്ന് തടയുകയായിരുന്നു. നാട്ടുകാർ ഒത്തുകൂടുകയും ഉദ്യോഗസ്ഥരെ ചോദ്യം ചെയ്യാൻ തുടങ്ങുകയും ചെയ്തതോടെ, വാഹനത്തിലുണ്ടായിരുന്ന ഒരു പോലീസ് ഉദ്യോഗസ്ഥൻ ജീപ്പിൽ നിന്ന് ഇറങ്ങി ഓടി രക്ഷപ്പെട്ടു. സംഭവത്തെത്തുടർന്ന് കൂടുതൽ പോലീസ് സംഘം സ്ഥലത്തെത്തുകയും വാഹനം ഓടിച്ച ഉദ്യോഗസ്ഥനെ കസ്റ്റഡിയിലെടുക്കുകയും ചെയ്തു.
