മെൽബൺ: ഓസ്ട്രേലിയയിലെ ഭവന വിപണിയിൽ ചരിത്രത്തിലെ ഏറ്റവും വലിയ പ്രതിസന്ധി രൂക്ഷമാകുന്നു. രാജ്യത്തെ പ്രധാന നഗരങ്ങളിലെല്ലാം വീട്ടുവാടക റെക്കോർഡ് ഉയരത്തിലാണ്. സിഡ്നി ഉൾപ്പെടെയുള്ള നഗരങ്ങളിലെ ഭവനക്ഷാമവും ഉയർന്ന വാടകയും യൂണിവേഴ്സിറ്റി വിദ്യാർത്ഥികളെയും സാധാരണക്കാരെയും കടുത്ത സാമ്പത്തിക പ്രതിസന്ധിയിലാക്കിയിരിക്കുന്നു. ഡൊമെയ്ൻ പുറത്തുവിട്ട ഏറ്റവും പുതിയ റിപ്പോർട്ടുകൾ പ്രകാരം, ദേശീയ തലത്തിൽ വാടകക്കാർക്ക് ഒഴിവുള്ള വീടുകളുടെ നിരക്ക് ഒരു ശതമാനത്തിലും താഴെയായി ചുരുങ്ങി.
ഭക്ഷണം, പഠന സാമഗ്രികൾ, യാത്രാ ചിലവുകൾ എന്നിവ കഴിഞ്ഞാൽ വാടക നൽകാൻ പോലും യൂണിവേഴ്സിറ്റി വിദ്യാർത്ഥികൾ പാടുപെടുകയാണ്. നിലവിലെ വാടകയും മറ്റ് ചിലവുകളും കഴിഞ്ഞാൽ ഭാവിയിലേക്ക് യാതൊന്നും കരുതിവയ്ക്കാൻ കഴിയാത്ത അവസ്ഥയിലാണ് വിദ്യാർത്ഥികൾ. Domain-ന്റെ ഏറ്റവും പുതിയ റിപ്പോർട്ട് അനുസരിച്ച്, ഓസ്ട്രേലിയയിലെ എല്ലാ തലസ്ഥാന നഗരങ്ങളിലും വാടക നിരക്കുകൾ സർവ്വകാല റെക്കോർഡിലാണ്. രാജ്യത്തെ വീടുകളുടെ വാടക കഴിഞ്ഞ ഒരു വർഷത്തിനിടെ 7.7 ശതമാനം ഉയർന്നു.
സിഡ്നിയിൽ വീടുകളുടെ ശരാശരി വാടക ആഴ്ചയിൽ $850 എന്ന റെക്കോർഡ് തുകയിലേക്ക് എത്തിയിരിക്കുകയാണ്. നാല് വർഷത്തിനിടയിലെ ഏറ്റവും വലിയ കുതിച്ചുചാട്ടമാണിത്. കൂടാതെ, വാടക നിരക്കിൽ പെർത്തിനെ പിന്തള്ളി ഡാർവിൻ രാജ്യത്തെ രണ്ടാമത്തെ ഏറ്റവും ചിലവേറിയ നഗരമായി മാറി.
ശക്തമായ ജനസംഖ്യാ വളർച്ച, ഭവനങ്ങളുടെ അപര്യാപ്തത, ഉയർന്ന പലിശ നിരക്കുകൾ എന്നിവയാണ് ഈ വിപണിയിലെ തകർച്ചയ്ക്ക് പ്രധാന കാരണമെന്ന് Domain-ന്റെ ചീഫ് റിസർച്ച് ആൻഡ് ഇക്കണോമിക്സ് ഡോ. നിക്കോള പവൽ (Dr. Nicola Powell) വ്യക്തമാക്കുന്നു. രാജ്യത്തെ വാടക ഒഴിവ് നിരക്ക് (Vacancy rate) നിലവിൽ 1 ശതമാനത്തിന് താഴെയാണ്. ഡാർവിനിൽ ഇത് 0.1 ശതമാനം വരെ താഴ്ന്നു.
വരി വളരെ കുറഞ്ഞ എണ്ണം വീടുകൾക്കായി നിരവധി വാടകക്കാർ മത്സരിക്കേണ്ടി വരുന്ന സാഹചര്യമാണ് നിലവിലുള്ളത്. ഇത് ഉടമകൾക്ക് വാടക വർദ്ധിപ്പിക്കാൻ അവസരമൊരുക്കുന്നു. വർഷങ്ങളായി തുടരുന്ന ഭവന വിതരണത്തിലെ അപര്യാപ്തതയാണ് പ്രശ്നം വഷളാക്കിയതെന്ന് ഡോ. പവൽ ചൂണ്ടിക്കാട്ടുന്നു.
സർക്കാരിന്റെ പുതിയ നികുതി പരിഷ്കാരങ്ങൾ വാടക വിപണിയെ എങ്ങനെ ബാധിക്കുമെന്ന് വരും മാസങ്ങളിൽ മാത്രമേ വ്യക്തമാകൂ. പുതിയ നിക്ഷേപകർ റിയൽ എസ്റ്റേറ്റ് മേഖലയിൽ നിന്നും പിന്തിരിയുന്നത് പുതിയ ഭവനങ്ങളുടെ നിർമ്മാണം കുറയാൻ കാരണമായേക്കാം. ഇത് ഭാവിയിൽ വാടക ഭവനങ്ങൾ കൂടുതൽ അപര്യാപ്തമാകാനും വില ഇനിയും ഉയരാനും വഴിവെക്കും.
ജൂൺ 2026-ലെ SQM Research ഡാറ്റ പ്രകാരം, ചില നഗരങ്ങളിൽ വാടക വർദ്ധനവ് ചെറിയ തോതിൽ കുറഞ്ഞിട്ടുണ്ടെങ്കിലും, മലയാളി വിദ്യാർത്ഥികൾ ഉൾപ്പെടെയുള്ള വാടകക്കാർ ഇപ്പോഴും കടുത്ത സാമ്പത്തിക സമ്മർദ്ദത്തിലാണ് തുടരുന്നത്.
