മെൽബൺ/സിഡ്നി: ഓസ്ട്രേലിയയിലെ വാടകക്കാർ അവരുടെ മൊത്തം വരുമാനത്തിന്റെ റെക്കോർഡ് ശതമാനം ഭവനച്ചെലവുകൾക്കായി ചിലവഴിക്കേണ്ടി വരുന്നതായി പുതിയ പഠന റിപ്പോർട്ട്. പ്രോപ്പർട്ടി റിസർച്ച് കമ്പനിയായ ‘കോട്ടാലിറ്റി’ പുറത്തുവിട്ട കണക്കുകൾ പ്രകാരം, കഴിഞ്ഞ വർഷം പകുതിയോടെ രേഖപ്പെടുത്തിയ 0.9 ശതമാനം എന്ന താഴ്ന്ന നിരക്കിൽ നിന്നും വാടക നിരക്കുകൾ അതിവേഗം ഉയരുകയാണ്.
മാർച്ച് വരെയുള്ള മൂന്ന് മാസത്തിനിടെ വാടകയിൽ 2.1 ശതമാനം വർധനവുണ്ടായി. തൊട്ടുമുമ്പത്തെ പാദത്തിൽ ഇത് 1.2 ശതമാനമായിരുന്നു. വാടകയ്ക്ക് നൽകാനുള്ള വീടുകളുടെ കടുത്ത ദൗർലഭ്യമാണ് ഈ വിലക്കയറ്റത്തിന് പ്രധാന കാരണം. നിലവിൽ ശരാശരി വരുമാനത്തിന്റെ 33 ശതമാനവും വാടകയ്ക്കായി മാത്രം മാറ്റിവെക്കേണ്ട അവസ്ഥയിലാണ് ഓസ്ട്രേലിയയിലെ കുടുംബങ്ങൾ. 2020 സെപ്റ്റംബറിൽ ഇത് വരുമാനത്തിന്റെ 26 ശതമാനം മാത്രമായിരുന്നു.
കഴിഞ്ഞ അഞ്ച് വർഷത്തിനിടയിലുണ്ടായ വാടക വർധനവ് ശരാശരി പ്രതിവാര വാടകയിൽ 202 ഡോളറിന്റെ അധികബാധ്യതയാണ് വരുത്തിവെച്ചിരിക്കുന്നത് എന്ന് കോട്ടാലിറ്റി റിസർച്ച് വിഭാഗം തലവൻ ജെറാർഡ് ബർഗ് പറഞ്ഞു. 2024-ലും 2025-ന്റെ പകുതി വരെയും വാടക വർധനവിൽ ചെറിയ കുറവ് പ്രകടമായിരുന്നെങ്കിലും, വർധിച്ചു വരുന്ന ആവശ്യത്തിനനുസരിച്ച് വീടുകൾ ലഭ്യമല്ലാത്തത് വിപണിയിൽ വലിയ സമ്മർദ്ദമുണ്ടാക്കുന്നതായി അദ്ദേഹം ചൂണ്ടിക്കാട്ടി.
ഓസ്ട്രേലിയയിലുടനീളമുള്ള വാടക ലിസ്റ്റിംഗുകൾ അഞ്ച് വർഷത്തെ ശരാശരിയേക്കാൾ 18 ശതമാനം കുറവാണ്. സിഡ്നിയിലും മെൽബണിലുമാണ് ഈ പ്രതിസന്ധി ഏറ്റവും രൂക്ഷം. സിഡ്നിയിൽ ലഭ്യമായ വീടുകളുടെ എണ്ണത്തിൽ 27 ശതമാനവും മെൽബണിൽ 21 ശതമാനവും കുറവുണ്ട്. രാജ്യത്തെ പ്രധാന നഗരങ്ങളിലെല്ലാം ഒഴിവുള്ള വീടുകളുടെ നിരക്ക് രണ്ട് ശതമാനത്തിന് താഴെയാണ്. ദേശീയ ശരാശരി 1.6 ശതമാനമായി ചുരുങ്ങി.
ഒഴിവുള്ള വീടുകളുടെ നിരക്ക് 1.5 ശതമാനത്തിലും താഴേക്ക് പോകുന്നത് വാടകക്കാർക്ക് ഉടമകളുമായി വിലപേശാനുള്ള സാധ്യത ഇല്ലാതാക്കുമെന്ന് ബർഗ് വ്യക്തമാക്കി. ഈ പ്രതിസന്ധി കാരണം പലർക്കും വീടുകൾ പങ്കിട്ട് താമസിക്കേണ്ടി വരികയോ, നഗരങ്ങളിൽ നിന്നും മാറി താമസിക്കേണ്ടി വരികയോ, അല്ലെങ്കിൽ സ്വന്തം കുടുംബത്തോടൊപ്പം തിരികെ പോയി താമസിക്കേണ്ടി വരികയോ ചെയ്യുന്ന സാഹചര്യമാണ് നിലവിലുള്ളതെന്നും റിപ്പോർട്ട് വ്യക്തമാക്കുന്നു.
