ലണ്ടൻ/സിഡ്നി: യൂറോപ്യൻ രാജ്യങ്ങളിൽ വസന്തകാലത്തിന്റെ അവസാന വാരം കനത്ത ചൂടിൽ വെന്തുരുകുന്നു. അന്തരീക്ഷത്തിലുണ്ടായ ശക്തമായ ഉയർന്ന മർദ്ദത്തെത്തുടർന്ന് രൂപപ്പെട്ട ‘ഹീറ്റ് ഡോം’ (Heat Dome) പ്രതിഭാസമാണ് നിലവിലെ അസാധാരണമായ ഉഷ്ണതരംഗത്തിന് കാരണം. പല രാജ്യങ്ങളിലും മേയ് മാസത്തിലെ ചരിത്രത്തിലെ ഏറ്റവും ഉയർന്ന താപനിലയാണ് ഈ ആഴ്ച രേഖപ്പെടുത്തിയത്. ബ്രിട്ടനിൽ ലണ്ടനിലെ ക്യൂ ഗാർഡൻസിൽ ചൊവ്വാഴ്ച 35.1 ഡിഗ്രി സെൽഷ്യസ് ചൂട് രേഖപ്പെടുത്തി. തിങ്കളാഴ്ച രേഖപ്പെടുത്തിയ 34.8 ഡിഗ്രി സെൽഷ്യസ് എന്ന റെക്കോർഡാണ് തൊട്ടടുത്ത ദിവസം തന്നെ തിരുത്തപ്പെട്ടത്. ഇതിനുമുമ്പ് 1922-ലും 1944-ലും രേഖപ്പെടുത്തിയ 32.8 ഡിഗ്രി സെൽഷ്യസ് ആയിരുന്നു മേയ് മാസത്തിലെ ഉയർന്ന നിരക്ക്. അയർലൻഡിലും സമാനമായി കില്ലാർണി, ക്ലോൺമെൽ എന്നിവിടങ്ങളിൽ മേയ് മാസത്തിലെ ഏറ്റവും ഉയർന്ന താപനിലയായ 28.8 ഡിഗ്രി സെൽഷ്യസ് രേഖപ്പെടുത്തി.
പകൽ സമയത്തെ ചൂട് മാത്രമല്ല, രാത്രിയിലെ താപനിലയും റെക്കോർഡ് ഉയരത്തിലാണ്. തെക്കുപടിഞ്ഞാറൻ ഇംഗ്ലണ്ടിലെ കാംബോണിൽ ചൊവ്വാഴ്ച രാത്രിയിലെ താപനില 21.4 ഡിഗ്രി സെൽഷ്യസിന് താഴേക്ക് പോകാത്തതിനാൽ കടുത്ത ഉഷ്ണമേഖലാ രാത്രിയാണ് (Tropical Night) അനുഭവപ്പെട്ടത്. ഫ്രാൻസിലും തിങ്കൾ, ചൊവ്വാ ദിവസങ്ങളിൽ താപനില 36 ഡിഗ്രി സെൽഷ്യസിലേക്ക് ഉയർന്നത് ചരിത്രത്തിലെ ഏറ്റവും ചൂടേറിയ മേയ് ദിനങ്ങളായി മാറി. ഫ്രാൻസിൽ ഉഷ്ണതരംഗവുമായി ബന്ധപ്പെട്ട് നേരിട്ടോ അല്ലാതെയോ ഏഴ് മരണങ്ങൾ റിപ്പോർട്ട് ചെയ്തിട്ടുണ്ടെന്ന് സർക്കാർ വക്താവ് അറിയിച്ചു. ഈ വർഷത്തെ ശരാശരി താപനിലയേക്കാൾ 10 മുതൽ 15 ഡിഗ്രി സെൽഷ്യസ് വരെ കൂടുതലാണിത്. ഈ ആഴ്ച മുഴുവൻ ഉയർന്ന ചൂട് തുടരുമെങ്കിലും അടുത്ത ആഴ്ചയോടെ യുകെയിൽ ഇതിന് നേരിയ ശമനമുണ്ടാകും.
അതേസമയം, ഭൂഗോളത്തിന്റെ മറുഭാഗത്ത് ഓസ്ട്രേലിയയുടെ തെക്കുകിഴക്കൻ, കിഴക്കൻ മേഖലകളിൽ ശക്തമായ ഇടിമിന്നൽ മുന്നറിയിപ്പ് തുടരുകയാണ്. വരും ദിവസങ്ങളിലും ശക്തമായ കാറ്റും കനത്ത മഴയും ആലിപ്പഴ വർഷവും ഉണ്ടാകുമെന്ന് ഓസ്ട്രേലിയൻ കാലാവസ്ഥാ നിരീക്ഷണ കേന്ദ്രം (BoM) അറിയിച്ചു. പെട്ടെന്നുള്ള വെള്ളപ്പൊക്ക സാധ്യത കണക്കിലെടുത്ത് വിവിധയിടങ്ങളിൽ പ്രത്യേക ജാഗ്രതാ നിർദ്ദേശവുമുണ്ട്. ക്വീൻസ്ലാൻഡിലെ ഡേബറോയിൽ ബുധനാഴ്ച വെറും 30 മിനിറ്റിനുള്ളിൽ 50 മില്ലിമീറ്റർ മഴ രേഖപ്പെടുത്തി. ന്യൂ സൗത്ത് വെയിൽസിലെ നരബ്രിയിൽ മണിക്കൂറിൽ 104 കിലോമീറ്റർ വേഗതയിലാണ് കാറ്റുവീശിയത്. വരും ദിവസങ്ങളിൽ ന്യൂ സൗത്ത് വെയിൽസിന്റെ മിഡ് നോർത്ത് കോസ്റ്റ്, അപ്പർ ഹണ്ടർ ഉൾപ്പെടെയുള്ള പ്രദേശങ്ങളിൽ 40 മുതൽ 70 മില്ലിമീറ്റർ വരെയും പ്രാദേശികമായി ചിലയിടങ്ങളിൽ 100 മില്ലിമീറ്റർ വരെയും കനത്ത മഴ പെയ്യാൻ സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പ് നൽകി
