ഫിലിപ്പീൻസിലെ ടാക്ലോബാൻ നഗരത്തിലെ സർക്കാർ നിയന്ത്രിതമായ സാൻ ജോസ് നാഷണൽ ഹൈസ്കൂളിൽ തിങ്കളാഴ്ച നടന്ന വെടിവയ്പിൽ മൂന്ന് വിദ്യാർഥികൾ കൊല്ലപ്പെടുകയും ഏഴ് പേർക്ക് പരിക്കേൽക്കുകയും ചെയ്തു. സംഭവവുമായി ബന്ധപ്പെട്ട് 14-ഉം 15-ഉം വയസ്സുള്ള രണ്ട് വിദ്യാർഥികളെ പൊലീസ് അറസ്റ്റ് ചെയ്തു.
രാവിലെ ക്ലാസുകൾ നടക്കുന്നതിനിടെയാണ് പ്രതികൾ പിസ്റ്റളുകളുമായി സ്കൂൾ പരിസരത്ത് പ്രവേശിച്ച് വെടിയുതിർക്കാൻ തുടങ്ങിയത്. വെടിവയ്പിന് പിന്നാലെ സ്കൂളിൽ പരിഭ്രാന്തി പരന്നു. പരിക്കേറ്റവരെ സമീപത്തെ ആശുപത്രികളിലേക്ക് മാറ്റി ചികിത്സ നൽകി.
ആദ്യഘട്ട ചോദ്യം ചെയ്യലിൽ സ്കൂളിലെ പീഡനവും (ബുള്ളിയിങ്) വ്യക്തിപരമായ വിരോധവുമാകാം ആക്രമണത്തിന് പിന്നിലെ കാരണമെന്ന് പ്രതികൾ സൂചിപ്പിച്ചതായി പൊലീസ് അറിയിച്ചു. എന്നാൽ സംഭവത്തിന്റെ യഥാർഥ കാരണം കണ്ടെത്താൻ അന്വേഷണം തുടരുകയാണ്. ഉപയോഗിച്ച ആയുധങ്ങളിൽ ഒന്ന് ഒരു വനിതാ പൊലീസ് ഉദ്യോഗസ്ഥയ്ക്ക് അനുവദിച്ചിരുന്ന പിസ്റ്റളാണെന്നും, അത് എങ്ങനെ പ്രതിയുടെ കൈവശമെത്തിയെന്ന കാര്യവും അന്വേഷിക്കുന്നതായി അധികൃതർ അറിയിച്ചു.
സംഭവത്തെ ഫിലിപ്പീൻസ് വിദ്യാഭ്യാസ വകുപ്പ് ശക്തമായി അപലപിച്ചു. കൊല്ലപ്പെട്ടവരുടെയും പരിക്കേറ്റവരുടെയും കുടുംബങ്ങൾക്ക് ആവശ്യമായ സഹായവും മാനസിക പിന്തുണയും ഉറപ്പാക്കുമെന്ന് സർക്കാർ അറിയിച്ചു.
