സിഡ്നി: സിഡ്നിയിലെ പ്രവാസി സമൂഹത്തിന്റെ ചരിത്രത്തിലെ തന്നെ ഏറ്റവും വലിയ ഓണാഘോഷങ്ങളിലൊന്നിന് ഗ്രാൻവിൽ വേദിയായി. സൗത്ത് ഇന്ത്യൻ കൾച്ചറൽ അസോസിയേഷൻ ഓഫ് ഓസ്ട്രേലിയയും (SIAA) ഇന്ത്യൻ ഓവർസീസ് കോൺഗ്രസും (IOC) സംയുക്തമായി സംഘടിപ്പിച്ച ‘ഇന്ത്യൻ ഓണം 2026’ വൻ ജനപങ്കാളിത്തം കൊണ്ടും സംഘാടന മികവുകൊണ്ടും ശ്രദ്ധേയമായി. സിഡ്നിയിൽ ഇതുവരെ സംഘടിപ്പിക്കപ്പെട്ടിട്ടുള്ളതിൽ വെച്ച് ഏറ്റവും വലിയ ഓണാഘോഷമാണിതെന്ന് പങ്കെടുത്തവരും പ്രമുഖരും അഭിപ്രായപ്പെട്ടു.
ഓഗസ്റ്റ് 23-ന് ഗ്രാൻവിലിലെ ‘ദി വൈൻയാർഡ് കാർമൽ മോഹർ ഹാളി’ൽ (The Vineyard Karmel Mohr Hall) നടന്ന ചടങ്ങിൽ 1700-ലധികം ആളുകളാണ് ഒത്തുചേർന്നത്. ഫെഡറൽ പാർലമെന്റ് അംഗം ഡോ. ആൻഡ്രൂ ചാർട്ടൺ (Dr. Andrew Charlton, Federal Member for Parramatta), പ്രത്യേക അതിഥി സ്പീക്കർ ഗേബ് കവനഗ് (Gabe Kavanagh) എന്നിവർ മുഖ്യാതിഥികളായി പങ്കെടുത്തു. ചലച്ചിത്ര നടി വിമല രാമന്റെ സാന്നിധ്യം ആഘോഷങ്ങൾക്ക് കൂടുതൽ തിളക്കം പകർന്നു. ഐ.ഒ.സി നാഷണൽ പ്രസിഡന്റ് മനോജ് ഷറോൺ, വിവിധ ഐ.ഒ.സി ചാപ്റ്ററുകളുടെ പ്രസിഡന്റുമാരും ഭാരവാഹികളും ചടങ്ങിൽ സന്നിഹിതരായിരുന്നു.
ഓസ്ട്രേലിയയുടെ വിവിധ ഭാഗങ്ങളിൽ നിന്നുള്ള ദക്ഷിണേന്ത്യൻ, ഉത്തരേന്ത്യൻ, പശ്ചിമേന്ത്യൻ കുടുംബങ്ങളും ശ്രീലങ്കൻ കൂട്ടായ്മകളും ഒത്തുചേർന്ന വേദിയിൽ വിഭവസമൃദ്ധമായ പരമ്പരാഗത ഓണസദ്യയും വിളമ്പി. സിഡ്നി നവോദയയുടെ പ്രവർത്തകരാണ് ഇത്രയും വലിയ ജനക്കൂട്ടത്തിന് ചിട്ടയായി ഭക്ഷണം വിളമ്പി നൽകിയത്. SIAA പ്രസിഡന്റ് ആന്റണി യേശുദാസ്, സെക്രട്ടറി ഷൈബു സി. ബാലൻ എന്നിവരുൾപ്പെടെയുള്ള ഭാരവാഹികൾ ആഘോഷങ്ങൾക്ക് നേതൃത്വം നൽകി.
തുടർന്ന് പ്രശസ്ത ഗായകരായ അമൃത സുരേഷ്, അഭിരാമി സുരേഷ് എന്നിവരുടെ നേതൃത്വത്തിൽ പ്രമുഖ കലാകാരന്മാർ അണിനിരന്ന സംഗീതനിശയും ലൈവ് സ്റ്റേജ് ഷോയും അരങ്ങേറി. ജ്യോതി റിനീഷ്, ശ്രുതി സുനിൽ, ദിവ്യ സജിത് എന്നിവർ പരിപാടികൾ ഏകോപിപ്പിച്ചു. സിഡ്നിയിലെ പ്രവാസി മലയാളികളുടെ ചരിത്രത്തിൽ ശ്രദ്ധേയമായ അടയാളപ്പെടുത്തലായി മാറിയ ആഘോഷം വരുംവർഷങ്ങളിലും വലിയ മാതൃകയായിരിക്കുമെന്ന് സംഘാടകർ വ്യക്തമാക്കി. പരിപാടി വിജയകരമാക്കാൻ സഹകരിച്ച ഏവർക്കും SIAA – IOC ടീം നന്ദി രേഖപ്പെടുത്തി.
