ന്യൂഡൽഹി: രാജ്യത്ത് അടിയന്തരാവസ്ഥയ്ക്ക് സമാനമായ സാഹചര്യമാണുള്ളതെന്ന് കൊക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദീപ്കെ. വോട്ടർപട്ടികയിലെ ക്രമക്കേടുകൾ ആരോപിച്ച് തിരഞ്ഞെടുപ്പ് കമ്മീഷനെതിരെ ശക്തമായ പ്രതിഷേധം സംഘടിപ്പിക്കുമെന്നും തിരംഗ മാർച്ചിന് മുന്നോടിയായി തന്നെ കസ്റ്റഡിയിലെടുത്തേക്കുമെന്ന് ആശങ്കയുണ്ടെന്നും അദ്ദേഹം പറഞ്ഞു.
ദേശീയ പതാക ഉയർത്തുന്നവരെ തടയുകയും അറസ്റ്റ് ചെയ്യുകയും ചെയ്യുന്ന ഡൽഹി പൊലീസിന്റെ നടപടികളെ ദീപ്കെ വിമർശിച്ചു. പ്രധാനമന്ത്രി നരേന്ദ്ര മോദിയുടെ റാലിയിൽ ത്രിവർണ പതാക വീശിയാൽ റാലി റദ്ദാക്കുമോയെന്നും അദ്ദേഹം ചോദിച്ചു. ദേശീയ പതാക ഉയർത്തുന്നവരെ തടവിലാക്കുന്ന നടപടിയെ അദ്ദേഹം അപലപിച്ചു.
നേരത്തെ സിജെപി നേതാക്കളായ സൗരവ് ദാസ്, അശുതോഷ് റാങ്ക എന്നിവരെ പൊലീസ് കസ്റ്റഡിയിലെടുത്ത സംഭവവും ദീപ്കെ ചൂണ്ടിക്കാട്ടി. തങ്ങളെ രഹസ്യാന്വേഷണ ഏജൻസികൾ നിരീക്ഷിക്കുന്നുണ്ടെന്നും അദ്ദേഹം ആരോപിച്ചു.
മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രതിഷേധത്തിന്റെ ഭാഗമായി തിരഞ്ഞെടുപ്പ് കമ്മീഷണറെ മാറ്റണമെന്നാണ് തങ്ങളുടെ ആവശ്യമെന്നും ഭരണമാറ്റമല്ല ലക്ഷ്യമെന്നും ദീപ്കെ വ്യക്തമാക്കി. തിരഞ്ഞെടുപ്പ് കമ്മീഷനെതിരായ ആരോപണങ്ങളും പൊലീസ് നടപടികളും സംബന്ധിച്ച അദ്ദേഹത്തിന്റെ പ്രതികരണങ്ങൾക്കിടെ, സർക്കാരിനെതിരായ വിമർശനം ശക്തമാക്കി.
