ഫോർട്ട് കൊച്ചി: മദ്യം വാങ്ങാൻ പണം നൽകാത്തതിനെ തുടർന്നുണ്ടായ തർക്കത്തിൽ അമ്മയെ മകൻ ക്രൂരമായി മർദ്ദിച്ചും ചവിട്ടിയും കൊലപ്പെടുത്തി. ഫോർട്ട് കൊച്ചി അമരാവതി തോട്ടുപീടിക ഭാഗത്ത് താമസിക്കുന്ന ലക്ഷ്മി (65) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഇവരുടെ മകൻ കണ്ണനെ ഫോർട്ട് കൊച്ചി പോലീസ് കസ്റ്റഡിയിലെടുത്തു.
സ്ഥിരമായി മദ്യപിക്കുന്നതിനായി കണ്ണൻ അമ്മയോട് നിരന്തരം പണം ആവശ്യപ്പെടാറുണ്ടായിരുന്നുവെന്ന് പോലീസ് പറഞ്ഞു. സംഭവദിവസം പകലും ഇയാൾ പണത്തിനായി അമ്മയെ സമീപിച്ചെങ്കിലും കയ്യിൽ പണമില്ലെന്ന് പറഞ്ഞ് ലക്ഷ്മി അത് നിരസിച്ചു. തുടർന്ന് വൈകുന്നേരത്തോടെ കടുത്ത മദ്യലഹരിയിൽ വീട്ടിൽ തിരിച്ചെത്തിയ കണ്ണൻ അമ്മയുമായി വീണ്ടും വാക്കുതർക്കത്തിലേർപ്പെട്ടു. തർക്കം രൂക്ഷമായതോടെ ഇയാൾ ലക്ഷ്മിയെ അതിക്രൂരമായി മർദ്ദിക്കുകയും നെഞ്ചിലും വയറ്റിലും ആവർത്തിച്ച് ചവിട്ടുകയുമായിരുന്നു. ക്രൂരമായ മർദനമേറ്റ് ഗുരുതരമായി പരിക്കേറ്റ ലക്ഷ്മി സംഭവസ്ഥലത്തുവെച്ചുതന്നെ മരിച്ചു.
വിവരമറിഞ്ഞ് ഉടൻ സ്ഥലത്തെത്തിയ ഫോർട്ട് കൊച്ചി പോലീസ് സംഘം പ്രതിയായ കണ്ണനെ കസ്റ്റഡിയിലെടുത്ത് അറസ്റ്റ് രേഖപ്പെടുത്തുന്നതിനുള്ള നടപടികൾ ആരംഭിച്ചു. ഇൻക്വസ്റ്റ് നടപടികൾ പൂർത്തിയാക്കിയ ശേഷം ലക്ഷ്മിയുടെ മൃതദേഹം പോസ്റ്റ്‌മോർട്ടത്തിനായി എറണാകുളം ജനറൽ ആശുപത്രിയിലേക്ക് മാറ്റി. സംഭവത്തിൽ പോലീസ് വിശദമായ അന്വേഷണം നടത്തിവരികയാണ്.
