അഡ്ലെയ്ഡ്: രാജ്യാന്തര സമാധാന ദൗത്യങ്ങൾക്കിടയിലും വിദേശ സേവനത്തിനിടയിലും ജീവൻ ബലിയർപ്പിക്കേണ്ടി വന്ന സൗത്ത് ഓസ്ട്രേലിയൻ പോലീസ് (SAPOL) അംഗങ്ങളുടെ സ്മരണ പുതുക്കി അഡ്ലെയ്ഡിൽ പ്രത്യേക അനുസ്മരണ ചടങ്ങ് സംഘടിപ്പിച്ചു. വരാനിരിക്കുന്ന അൻസാക് ദിനത്തിന് (Anzac Day) മുന്നോടിയായി ഫോർട്ട് ലാർഗ്സ് പോലീസ് അക്കാദമിയിലെ ‘വാൾ ഓഫ് റിമംബറൻസി’ൽ (Wall of Remembrance) നടന്ന ചടങ്ങിൽ മുതിർന്ന ഉദ്യോഗസ്ഥരും വിശിഷ്ടാതിഥികളും പങ്കെടുത്തു.
വിവിധ യുദ്ധങ്ങളിലും സായുധ പോരാട്ടങ്ങളിലും രാജ്യാന്തര സമാധാന പരിപാലന ദൗത്യങ്ങളിലും ഓസ്ട്രേലിയയെ പ്രതിനിധീകരിച്ചവരുടെ സേവനങ്ങളെയും ത്യാഗങ്ങളെയും ചടങ്ങിൽ സ്മരിച്ചു. പോലീസ് ചാപ്ലിൻ റവറന്റ് സ്കോട്ട് കോംബ്രിഡ്ജ് പ്രാർത്ഥനകൾക്ക് നേതൃത്വം നൽകി. രണ്ടാം ലോകമഹായുദ്ധകാലത്ത് തായ്-ബർമ റെയിൽവേയിൽ സേവനമനുഷ്ഠിക്കുന്നതിനിടെ പരിക്കേറ്റ് 1943 ജൂൺ 17-ന് അന്തരിച്ച ഫൂട്ട് കോൺസ്റ്റബിൾ ജെയിംസ് ഹാമിൽട്ടൺ ബീറ്റിയെ ചടങ്ങിൽ പ്രത്യേകം അനുസ്മരിച്ചു.
സൗത്ത് ഓസ്ട്രേലിയൻ പോലീസ് ബാൻഡിന്റെ അകമ്പടിയോടെ നടന്ന ചടങ്ങിൽ ഗീതാലാപനം, പുഷ്പചക്രം അർപ്പിക്കൽ എന്നിവ നടന്നു. വീരമൃത്യു വരിച്ചവർക്കായി ‘ദി ലാസ്റ്റ് പോസ്റ്റ്’ മുഴക്കുകയും ഒരു മിനിറ്റ് മൗനം ആചരിക്കുകയും ചെയ്തു. ഏപ്രിൽ 25 ശനിയാഴ്ച സംസ്ഥാനത്തുടനീളം നടക്കുന്ന അൻസാക് ദിന ചടങ്ങുകളിൽ സേപോൾ അംഗങ്ങൾ സജീവമായി പങ്കെടുക്കുമെന്നും അധികൃതർ അറിയിച്ചു.
