കൊച്ചി: പദ്ധതികളുടെ നിർമ്മാണച്ചെലവിനേക്കാൾ കൂടുതൽ തുക സ്ഥലം ഏറ്റെടുക്കുന്നതിന് വേണ്ടി വരുന്ന സാഹചര്യം ഒഴിവാക്കാൻ പൊതുമരാമത്ത് വകുപ്പിന്റെ കീഴിൽ പ്രത്യേക ലാൻഡ് അക്വിസിഷൻ വിങ് രൂപീകരിക്കുമെന്ന് പൊതുമരാമത്ത് വകുപ്പ് മന്ത്രി പി.കെ. ബഷീർ. റവന്യൂ വകുപ്പിൽ നിന്നുള്ള ഡെപ്യൂട്ടി കളക്ടറുടെ നേതൃത്വത്തിലായിരിക്കും ഈ വിങ് പ്രവർത്തിക്കുക. വടുതല റെയിൽവേ മേൽപ്പാലത്തിന്റെയും വടുതല-പേരണ്ടൂർ പാലത്തിന്റെയും നിർമ്മാണ ഉദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം.
അഡ്വാൻസ് പൊസഷൻ നൽകുന്നതിലെ തടസ്സങ്ങളും പണം ലഭിച്ച ശേഷമേ സ്ഥലം വിട്ടുനൽകൂ എന്ന നിലപാടുകളുമാണ് പല പദ്ധതികളും പത്തു മുതൽ പന്ത്രണ്ടു വർഷത്തോളം നീണ്ടുപോകാൻ കാരണമെന്ന് മന്ത്രി ചൂണ്ടിക്കാട്ടി. കിഫ്ബി വഴിയോ മറ്റ് ഏജൻസികൾ വഴിയോ ഫണ്ട് കണ്ടെത്തുകയും മൂന്ന് മുതൽ ആറ് മാസത്തിനകം സ്ഥലം ഏറ്റെടുത്ത് തുക വിതരണം ചെയ്യുകയും ചെയ്യുന്ന പുതിയ സംവിധാനത്തെക്കുറിച്ച് മുഖ്യമന്ത്രിയുമായി ചർച്ച നടത്തിയിട്ടുണ്ടെന്നും അദ്ദേഹം വ്യക്തമാക്കി.
പൊതുവികസനത്തിനായി സ്ഥലം സൗജന്യമായി വിട്ടുനൽകാൻ തയ്യാറാകുന്ന പ്രദേശങ്ങൾക്ക് വികസന മുൻഗണന നൽകും. പച്ചാളം ജങ്ഷൻ വികസനത്തിനായി കൊച്ചി കോർപ്പറേഷൻ സ്ഥലം ഏറ്റെടുത്തു നൽകിയാൽ പി.ഡബ്ല്യു.ഡി തുക അനുവദിക്കുമെന്ന് മേയർക്ക് മന്ത്രി ഉറപ്പുനൽകി. ഗോശ്രീ പദ്ധതിയിലെ തുക പാലങ്ങൾക്കും അനുബന്ധ റോഡുകൾക്കും വിനിയോഗിക്കാമെന്ന നിർദ്ദേശവും മന്ത്രി മുന്നോട്ടുവെച്ചു.
സംസ്ഥാനത്ത് പുതിയ ബൈപ്പാസുകൾ, ഫ്ലൈഓവറുകൾ, ജങ്ഷൻ വികസനങ്ങൾ എന്നിവയെക്കുറിച്ച് സമഗ്രമായി പഠിച്ച് റിപ്പോർട്ട് സമർപ്പിക്കാൻ റിട്ട. ഐ.എ.എസ് ഉദ്യോഗസ്ഥൻ ഷാജഹാന്റെ നേതൃത്വത്തിൽ വിദഗ്ദ്ധ സമിതിയെ നിയോഗിച്ചിട്ടുണ്ട്. രണ്ടു മാസത്തിനകം ഈ സമിതി റിപ്പോർട്ട് സർക്കാരിന് കൈമാറും. ഉദ്ഘാടനം നിർവഹിച്ച രണ്ട് പാലങ്ങളുടെയും നിർമ്മാണം പതിനെട്ട് മാസത്തിനകം പൂർത്തിയാക്കണമെന്നും മന്ത്രി നിർദ്ദേശിച്ചു. പൊതുമരാമത്ത് ഉദ്യോഗസ്ഥർ നിർമ്മാണ സ്ഥലങ്ങളിൽ നേരിട്ടെത്തി കൃത്യമായ വിലയിരുത്തലുകൾ നടത്തണമെന്നും ഓഫീസിലിരുന്ന് മൊബൈൽ ഫോൺ വഴിയുള്ള നിരീക്ഷണം മാത്രം പോരെന്നും മന്ത്രി കൂട്ടിച്ചേർത്തു.
