മെൽബൺ: പുത്തിഗെ മഠത്തിന്റെ മെൽബൺ ശാഖയായ ശ്രീ വെങ്കട കൃഷ്ണ ബൃന്ദാവനത്തിന്റെ നേതൃത്വത്തിൽ സംഘടിപ്പിച്ച ശ്രീ ഗുരു രാഘവേന്ദ്ര സ്വാമി ആരാധനാ മഹോത്സവം ഭക്തിസാന്ദ്രമായി സമാപിച്ചു. മെൽബണിലെ വിവിധ ഭാഗങ്ങളിൽ നിന്നായി എഴുനൂറിലധികം ഭക്തജനങ്ങളാണ് പുണ്യചടങ്ങുകളിൽ പങ്കുചേരാനും ശ്രീ ഗുരു രാഘവേന്ദ്ര സ്വാമിയുടെ അനുഗ്രഹം തേടാനുമായി എത്തിയത്.
പ്രതിഷ്ഠാ മൂർത്തികൾക്കും ശ്രീ ഗുരു രാഘവേന്ദ്ര സ്വാമിക്കും നടത്തിയ പഞ്ചാമൃത അഭിഷേകം, അഷ്ടോത്തര പൂജ, മഹാ മംഗളാരതി എന്നിവയുൾപ്പെടെയുള്ള പരമ്പരാഗത ആചാരങ്ങളോടെയായിരുന്നു ചടങ്ങുകൾ നടന്നത്. പുത്തിഗെ മഠത്തിന്റെ അന്താരാഷ്ട്ര ശാഖകളുടെ കോർഡിനേറ്റർ ശ്രീ പ്രസന്നാചാര്യ ആഘോഷങ്ങൾക്ക് നേതൃത്വം നൽകി. ശ്രീ വെങ്കട കൃഷ്ണ ബൃന്ദാവനത്തിലെ മുഖ്യ പുരോഹിതൻ ശ്രീ വിശ്വനാഥ ആചാര്യ പൂജകളും അനുബന്ധ കർമ്മങ്ങളും നിർവ്വഹിച്ചു.
പൗരത്വം, കസ്റ്റംസ്, ബഹുസ്വരത, അന്താരാഷ്ട്ര വിദ്യാഭ്യാസം എന്നിവയുടെ ചുമതലയുള്ള അസിസ്റ്റന്റ് മിനിസ്റ്റർ ജൂലിയൻ ഹിൽ എം.പി, വിക്ടോറിയൻ ടൂറിസം, കായിക, വ്യാപാര-നിക്ഷേപ മന്ത്രി സ്റ്റീവ് ഡിമോപൗലോസ് എം.പി, ഗ്ലെൻ വേവർലി എം.എൽ.എ ജോൺ മുള്ളാഹി, സൗത്ത് ഈസ്റ്റേൺ മെട്രോപൊളിറ്റൻ റീജിയൺ പ്രതിനിധി ലീ ടർലാമിസ് ഒ.എ.എം എം.പി തുടങ്ങി നിരവധി പ്രമുഖ ഓസ്ട്രേലിയൻ നേതാക്കൾ ചടങ്ങിൽ പങ്കെടുത്തു. മഠത്തിന് വേണ്ടി ശ്രീ രമേഷ്, ശ്രീ ജഗൻ മോഹൻ, ശ്രീ അശ്വിൻ എന്നിവർ ചേർന്ന് വിശിഷ്ടാതിഥികളെയും ഭക്തരെയും സ്വീകരിച്ചു.
വിവിധ സമുദായങ്ങൾക്ക് തങ്ങളുടെ മതപരവും സാംസ്കാരികവുമായ പാരമ്പര്യങ്ങൾ സംരക്ഷിക്കാനും ആഘോഷിക്കാനും അവസരമൊരുക്കുന്ന ഓസ്ട്രേലിയൻ സർക്കാരിന്റെ ബഹുസ്വര നയങ്ങൾക്ക് ശ്രീ പ്രസന്നാചാര്യ നന്ദി അറിയിച്ചു. ഭാരതത്തിന്റെ സമ്പന്നമായ പൈതൃകം നിലനിർത്തുന്നതിനൊപ്പം ഓസ്ട്രേലിയയുടെ സാമൂഹിക, സാംസ്കാരിക ജീവിതത്തിന് വലിയ സംഭാവനകൾ നൽകാൻ ശ്രീ വെങ്കട കൃഷ്ണ ബൃന്ദാവനത്തിന് സാധിക്കുന്നുണ്ടെന്ന് അദ്ദേഹം കൂട്ടിച്ചേർത്തു. കോവിഡ് മഹാമാരിയുടെ കാലഘട്ടത്തിലടക്കം ശ്രീ വെങ്കട കൃഷ്ണ ബൃന്ദാവനവും അവിടുത്തെ സന്നദ്ധപ്രവർത്തകരും നൽകിയ മികച്ച സാമൂഹിക സേവനങ്ങളെ സന്ദർശകരായ വിശിഷ്ടാതിഥികൾ പ്രശംസിച്ചു.
