സിഡ്നി: ഓസ്ട്രേലിയയിൽ ഇന്ന് പിതൃദിനം (ഫാദേഴ്സ് ഡേ) വിപുലമായി ആഘോഷിക്കുന്നു. സെപ്റ്റംബർ മാസത്തിലെ ആദ്യ ഞായറാഴ്ചയാണ് ഓസ്ട്രേലിയയും അയൽരാജ്യമായ ന്യൂസിലൻഡും ഔദ്യോഗികമായി ഫാദേഴ്സ് ഡേ ആയി ആചരിക്കുന്നത്. യുഎസ്, യുകെ, ഇന്ത്യ ഉൾപ്പെടെയുള്ള ഭൂരിഭാഗം രാജ്യങ്ങളിലും ജൂൺ മാസത്തിലെ മൂന്നാമത്തെ ഞായറാഴ്ച പിതൃദിനമായി ആചരിക്കുമ്പോൾ, ദക്ഷിണാർദ്ധഗോളത്തിലെ കാലാവസ്ഥയും വാണിജ്യ കലണ്ടറും പരിഗണിച്ചാണ് ഓസ്ട്രേലിയ സെപ്റ്റംബർ മാസം ഇതിനായി തിരഞ്ഞെടുത്തത്.
വസന്തകാലത്തിന്റെ ആരംഭം കുറിക്കുന്ന ഈ ദിനത്തിൽ കുടുംബാംഗങ്ങൾ ഒത്തുചേർന്ന് പ്രഭാതഭക്ഷണങ്ങൾ ഒരുക്കിയും പിതാക്കന്മാർക്ക് ആശംസകളും സമ്മാനങ്ങളും കൈമാറിയും ദിനം സവിശേഷമാക്കുന്നു. രാജ്യത്തെ വിവിധ പാർക്കുകളിലും ബീച്ചുകളിലും ബാർബിക്യു കൂട്ടായ്മകളും പ്രത്യേക പരിപാടികളും സംഘടിപ്പിച്ചിട്ടുണ്ട്. പ്രവാസി മലയാളി സമൂഹങ്ങളും വീടുകളിലും കൂട്ടായ്മകളിലും പിതൃദിനാഘോഷങ്ങൾ സംഘടിപ്പിക്കുന്നുണ്ട്. പിതൃസ്നേഹത്തിനും കുടുംബത്തിൽ പിതാക്കന്മാർ നൽകുന്ന സംഭാവനകൾക്കും നന്ദി അറിയിക്കുന്നതിനായി സ്കൂളുകളിലും കഴിഞ്ഞ ദിവസങ്ങളിൽ പ്രത്യേക പരിപാടികൾ നടന്നിരുന്നു.
