വാഷിങ്ടൺ: അമേരിക്കയുമായി ധാരണയിലെത്തുകയോ “പൂർണ കീഴടങ്ങൽ” അംഗീകരിക്കുകയോ ചെയ്തില്ലെങ്കിൽ ഇറാന് ഗുരുതര പ്രത്യാഘാതങ്ങൾ നേരിടേണ്ടിവരുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. ഹോർമുസ് കടലിടുക്കിലൂടെയുള്ള കപ്പൽഗതാഗതം പുനഃസ്ഥാപിക്കുന്നതും ഇറാന്റെ ആണവപരിപാടിയും പ്രധാന ചർച്ചാ വിഷയങ്ങളാണെന്നും അദ്ദേഹം വ്യക്തമാക്കി.
ഇറാനുമായി ചർച്ചകൾ പുരോഗമിക്കുകയാണെന്ന് ട്രംപ് അവകാശപ്പെട്ടെങ്കിലും അമേരിക്കയുമായി നേരിട്ടുള്ള ചർച്ചകൾ നടക്കുന്നില്ലെന്ന് ഇറാൻ വിദേശകാര്യ മന്ത്രാലയം നിഷേധിച്ചു. ഹോർമുസ് കടലിടുക്കിലെ കപ്പൽഗതാഗതവുമായി ബന്ധപ്പെട്ട് ഒമാനുമായാണ് ആശയവിനിമയം നടക്കുന്നതെന്ന് ഇറാൻ വിശദീകരിച്ചു.
അതേസമയം, ഇറാനെതിരായ പുതിയ സൈനിക നടപടി ഉണ്ടായാൽ ശക്തമായ തിരിച്ചടി നൽകുമെന്നും അമേരിക്കയുടെയും സഖ്യരാജ്യങ്ങളുടെയും ഊർജ അടിസ്ഥാനസൗകര്യങ്ങൾ ലക്ഷ്യമിടാൻ തയ്യാറാണെന്നും ഇറാൻ മുന്നറിയിപ്പ് നൽകിയിട്ടുണ്ട്. ഇരു രാജ്യങ്ങളും തമ്മിലുള്ള സംഘർഷാവസ്ഥ തുടരുന്നതിനിടെ നയതന്ത്ര നീക്കങ്ങളുടെ ഭാവിയെക്കുറിച്ച് അനിശ്ചിതത്വം നിലനിൽക്കുകയാണ്.
