ന്യൂഡൽഹി: രാജ്യസഭയിൽ പ്രതിപക്ഷ നേതാവ് മല്ലികാർജുൻ ഖാർഗെയും പാർലമെന്ററി കാര്യ മന്ത്രി കിരൺ റിജിജുവും തമ്മിൽ രൂക്ഷമായ വാക്കേറ്റമുണ്ടായി. ആഭ്യന്തരമന്ത്രി അമിത് ഷാ സഭയിലെത്തി പ്രതിപക്ഷം ഉന്നയിക്കുന്ന വിഷയങ്ങൾക്ക് മറുപടി നൽകണമെന്ന ആവശ്യവുമായി ബന്ധപ്പെട്ട ചർച്ചയ്ക്കിടെയാണ് സംഭവം.
പ്രതിപക്ഷ നേതാവിന് സഭാ നടപടികൾ നിർദേശിക്കാനാവില്ലെന്നും, ഏത് മന്ത്രി സർക്കാരിന് വേണ്ടി മറുപടി നൽകണമെന്നത് തീരുമാനിക്കാനുള്ള അധികാരം സർക്കാരിനും അധ്യക്ഷനുമാണെന്നും റിജിജു പറഞ്ഞു. ഇതിന് മറുപടിയായി സഭാ ചട്ടങ്ങൾ പാലിച്ചാണ് താൻ ആവശ്യം ഉന്നയിച്ചതെന്നും റിജിജു ചട്ടങ്ങൾ തെറ്റായി വ്യാഖ്യാനിക്കുകയാണെന്നും ഖാർഗെ ആരോപിച്ചു.
വാക്കേറ്റത്തെ തുടർന്ന് സഭയിൽ ബഹളമുണ്ടാകുകയും നടപടികൾ തടസപ്പെടുകയും ചെയ്തു. അമിത് ഷാ സഭയിലെത്തി വിശദീകരണം നൽകണമെന്ന ആവശ്യത്തിൽ പ്രതിപക്ഷം ഉറച്ചുനിൽക്കുമ്പോൾ, സർക്കാർ സഭ സുഗമമായി നടത്താൻ പ്രതിപക്ഷം സഹകരിക്കണമെന്ന് ആവശ്യപ്പെട്ടു.
