സിഡ്നി: വർഷങ്ങൾ നീണ്ട നിർമ്മാണങ്ങൾക്കും കാത്തിരിപ്പുകൾക്കുമൊടുവിൽ ഓസ്‌ട്രേലിയൻ വ്യോമയാന മേഖലയിൽ പുതിയ ചരിത്രം കുറിച്ച് വെസ്റ്റേൺ സിഡ്നി ഇന്റർനാഷണൽ (നാൻസി-ബേർഡ് വാൾട്ടൺ) എയർപോർട്ട് ഒക്ടോബർ 25 ഞായറാഴ്ച മുതൽ യാത്രാ സർവീസുകൾക്കായി ഔദ്യോഗികമായി തുറന്നുകൊടുക്കുന്നു. സിഡ്നിയുടെ യാത്രാചരിത്രത്തിൽ വലിയ വഴിത്തിരിവാകുന്ന വിമാനത്താവളത്തിൽ നിന്നുള്ള ആദ്യ യാത്രാവിമാനം ഞായറാഴ്ച രാവിലെ 11 മണിക്ക് ഗോൾഡ് കോസ്റ്റിലേക്ക് പറന്നുയരുന്ന ജെറ്റ്സ്റ്റാറിന്റെ ജെ.ക്യു362 (Jetstar JQ362) ആയിരിക്കും. ഏതാനും ആഴ്ചകൾക്ക് മുൻപ് യാത്രക്കാരില്ലാതെ ജെറ്റ്സ്റ്റാർ ഇവിടെ വിജയകരമായി ട്രയൽ ലാൻഡിംഗ് നടത്തിയിരുന്നു.
അന്താരാഷ്ട്ര സർവീസുകൾ ഒക്ടോബർ 26 തിങ്കളാഴ്ച മുതൽ ആരംഭിക്കും. ഓക്ക്‌ലാൻഡിൽ നിന്നുള്ള എയർ ന്യൂസിലാൻഡ് വിമാനമാണ് ആദ്യമായി ഇവിടെ സർവീസ് നടത്തുന്നത്. തുടർന്ന് നവംബർ 23-ന് സിംഗപ്പൂർ എയർലൈൻസും സർവീസുകൾ ആരംഭിക്കും. എന്നാൽ, ഓസ്‌ട്രേലിയയുടെ ദേശീയ വിമാനക്കമ്പനിയായ ക്വാന്റാസ് 2027 മാർച്ച് 28 മുതലായിരിക്കും വെസ്റ്റേൺ സിഡ്നിയിൽ നിന്ന് തങ്ങളുടെ യാത്രാ സർവീസുകൾ ഔദ്യോഗികമായി തുടങ്ങുക.
യാത്രാ സർവീസുകൾ ഞായറാഴ്ച ആരംഭിക്കുമെങ്കിലും കാർഗോ വിഭാഗത്തിന്റെ പ്രവർത്തനങ്ങൾ 2026 ജൂലൈ 26 മുതൽ തന്നെ സജീവമാണ്. വിമാനത്താവളം ചരക്ക് കയറ്റുമതിക്കായി പൂർണ്ണസജ്ജമാണെന്ന് ഡിപ്പാർട്ട്മെന്റ് ഓഫ് അഗ്രികൾച്ചർ വ്യക്തമാക്കിയിട്ടുണ്ട്. സിഡ്നി കിങ്സ്ഫോർഡ് സ്മിത്ത് വിമാനത്താവളത്തിലെ പോലെയുള്ള രാത്രികാല യാത്രാവിലക്കുകൾ (Curfew) ഇല്ലാതെ 24 മണിക്കൂറും തടസ്സമില്ലാതെ പ്രവർത്തിക്കാൻ സാധിക്കും എന്നതാണ് ഈ പുതിയ വിമാനത്താവളത്തിന്റെ ഏറ്റവും വലിയ സവിശേഷത.
യാത്രക്കാരുടെ പരിശോധനകൾ കൂടുതൽ കാര്യക്ഷമമാക്കാനും കാലതാമസം ഒഴിവാക്കാനുമായി അത്യാധുനിക സംവിധാനങ്ങളാണ് ടെർമിനലിൽ സജ്ജീകരിച്ചിരിക്കുന്നത്. ബയോസെക്യൂരിറ്റി പരിശോധനകൾക്കായി പ്രത്യേക പരിശീലനം നേടിയ നായ്ക്കളെ നിയോഗിച്ചിട്ടുണ്ട്. കൂടാതെ, ഓസ്‌ട്രേലിയയിലെ മറ്റ് വിമാനത്താവളങ്ങളിൽ നിന്ന് വ്യത്യസ്തമായി ലഗേജുകൾ അതിവേഗം സ്കാൻ ചെയ്യുന്നതിനായി നൂതനമായ 3D എക്സ്-റേ പരിശോധനാ സാങ്കേതികവിദ്യ ബാഗേജ് സംവിധാനത്തിൽ നേരിട്ട് ഉൾപ്പെടുത്തിയിട്ടുമുണ്ട്.
