തിരുവനന്തപുരം: രാജ്യത്ത് സ്ത്രീകൾക്ക് മതിയായ രാഷ്ട്രീയ പ്രാതിനിധ്യം ലഭിക്കുന്നില്ലെന്നും മുഖ്യമന്ത്രിസ്ഥാനം പോലുള്ള നിർണായക സ്ഥാനങ്ങളിലേക്ക് സ്ത്രീകളെ പരിഗണിക്കാത്തത് എന്തുകൊണ്ടാണെന്നും സി.പി.ഐ ദേശീയ നേതാവ് ആനി രാജ ചോദിച്ചു. വനിതാ രാഷ്ട്രീയ പങ്കാളിത്തവുമായി ബന്ധപ്പെട്ട ചർച്ചകളിലാണ് ആനി രാജയുടെ പ്രതികരണം.
നിയമസഭകളിലും പാർലമെന്റിലും സ്ത്രീകളുടെ സാന്നിധ്യം വർധിച്ചിട്ടുണ്ടെങ്കിലും അധികാരകേന്ദ്രങ്ങളിലെ നിർണായക സ്ഥാനങ്ങളിൽ ഇപ്പോഴും പുരുഷാധിപത്യമാണുള്ളതെന്ന് അവർ വിമർശിച്ചു. സ്ത്രീ സംവരണ ബിൽ പാസായ സാഹചര്യത്തിൽ രാഷ്ട്രീയ പാർട്ടികൾ കൂടുതൽ സ്ത്രീകൾക്ക് നേതൃത്വം നൽകാൻ തയ്യാറാകണമെന്നും ആനി രാജ അഭിപ്രായപ്പെട്ടു.
രാജ്യത്തിന്റെ വിവിധ സംസ്ഥാനങ്ങളിൽ വനിതകൾക്ക് മുഖ്യമന്ത്രിസ്ഥാനം ലഭിച്ചിട്ടുണ്ടെങ്കിലും അത് അപൂർവ സംഭവങ്ങളായി തുടരുകയാണെന്നും സ്ത്രീകളെ നേതൃത്വസ്ഥാനങ്ങളിലേക്ക് ഉയർത്തുന്നതിൽ രാഷ്ട്രീയ പാർട്ടികൾക്ക് ഇപ്പോഴും മടിയുണ്ടെന്നും അവർ ചൂണ്ടിക്കാട്ടി.സ്ത്രീകളുടെ രാഷ്ട്രീയ പങ്കാളിത്തം തെരഞ്ഞെടുപ്പ് മത്സരങ്ങളിൽ ഒതുങ്ങരുതെന്നും നയനിർണയ തലങ്ങളിലേക്കും അവരെ എത്തിക്കേണ്ടതുണ്ടെന്നും ആനി രാജ കൂട്ടിച്ചേർത്തു.
