ജറുസലേം: അമേരിക്കയും ഇറാനും തമ്മിൽ രൂപംകൊള്ളുന്ന സമാധാനകരാർ ഇസ്രയേലിനും പശ്ചിമേഷ്യൻ മേഖലയ്ക്കും ദോഷകരമാണെന്ന് ഇസ്രയേൽ പ്രതിപക്ഷനേതാവ് യായിർ ലാപിഡ് പ്രതികരിച്ചു. “ഈ കരാർ ഇസ്രയേലിനും മേഖലയ്ക്കും ഇറാൻ ജനങ്ങൾക്കും അനുകൂലമല്ല എന്ന് ലാപിഡ് മാധ്യമങ്ങളോട് പറഞ്ഞു.
കരാറിന്റെ ഭാഗമായി ഇറാൻ ഉയർന്ന അളവിൽ സമ്പുഷ്ടമാക്കിയ യുറേനിയം ശേഖരം കൈമാറുകയും ഹോർമുസ് കടലിടുക്ക് വീണ്ടും തുറക്കുകയും ചെയ്യുമെന്ന റിപ്പോർട്ടുകൾ പുറത്തുവന്നിട്ടുണ്ട്. അതിന് പകരമായി അമേരിക്ക ഉപരോധങ്ങളിൽ ഇളവ് നൽകുകയും കടൽ ഉപരോധം അവസാനിപ്പിക്കുകയും ചെയ്യുമെന്നാണ് സൂചന. എന്നാൽ ഇറാന്റെ മിസൈൽ പദ്ധതി, തീവ്രവാദ ഗ്രൂപ്പുകൾക്ക് നൽകുന്ന പിന്തുണ തുടങ്ങിയ പ്രധാന വിഷയങ്ങൾ കരാറിൽ ഉൾപ്പെട്ടിട്ടില്ലെന്ന് ലാപിഡ് വിമർശിച്ചു.
ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു അമേരിക്കൻ ഭരണകൂടത്തെ സ്വാധീനിക്കുന്നതിൽ പരാജയപ്പെട്ടുവെന്നും, ഇസ്രയേലിന്റെ നിലപാട് പര്യാപ്തമായി പരിഗണിക്കാതെയാണ് അമേരിക്ക ചർച്ചകൾ മുന്നോട്ടുകൊണ്ടുപോകുന്നതെന്നും ലാപിഡ് ആരോപിച്ചു. ഇസ്രയേലിന്റെ സുരക്ഷാ താൽപര്യങ്ങൾ സംബന്ധിച്ച് സ്വതന്ത്രമായി തീരുമാനമെടുക്കാനുള്ള അവകാശം രാജ്യം നിലനിർത്തണമെന്നും അദ്ദേഹം പറഞ്ഞു.
അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാനുമായുള്ള ചർച്ചകൾ “നല്ല രീതിയിൽ പുരോഗമിക്കുകയാണെന്ന്” നേരത്തെ വ്യക്തമാക്കിയിരുന്നു. പശ്ചിമേഷ്യയിൽ ദീർഘകാല സമാധാനത്തിനായി കൂടുതൽ രാജ്യങ്ങൾ ‘അബ്രഹാം ഉടമ്പടി’യിൽ ചേരണമെന്നും ട്രംപ് ആവശ്യപ്പെട്ടിട്ടുണ്ട്.
