സിഡ്നി: ക്വീൻസ്ലാൻഡ് പോലീസിനെ വെട്ടിച്ച് തോക്കുമായി കടന്നുകളഞ്ഞ ഇരുപത്തിയഞ്ചുകാരൻ, തൊട്ടുപിന്നാലെ ന്യൂ സൗത്ത് വെയ്ൽസ് (NSW) പോലീസ് നടത്തിയ പിന്തുടരലിനൊടുവിൽ വാഹനാപകടത്തിൽ മരിച്ചു. നോർത്തേൺ റിവേഴ്സ് മേഖലയിലെ മർവില്ലുംബയ്ക്ക് സമീപം ഞായറാഴ്ച പുലർച്ചെ രണ്ട് മണിയോടെയാണ് സംഭവം. അപകടത്തിന് പിന്നാലെ ന്യൂ സൗത്ത് വെയ്ൽസ് പോലീസ് കേസിൽ ‘ക്രിട്ടിക്കൽ ഇൻസിഡന്റ്’ (അടിയന്തര അന്വേഷണം) പ്രഖ്യാപിച്ചു.
ശനിയാഴ്ച അർദ്ധരാത്രിയോടെ ഗോൾഡ് കോസ്റ്റിലെ റോബിന ടൗൺ സെന്റർ ഡ്രൈവിൽ ഒരാൾ തോക്കുമായി നിൽക്കുന്നു എന്ന പൊതുജനങ്ങളുടെ പരാതിയെത്തുടർന്നാണ് ക്വീൻസ്ലാൻഡ് പോലീസ് അന്വേഷണം ആരംഭിച്ചത്. തുടർന്ന് പുലർച്ചെ 12.40-ഓടെ പോലീസ് ഈ വാഹനം കണ്ടെത്തുകയും ഡ്രൈവറെ കസ്റ്റഡിയിലെടുക്കാൻ ശ്രമിക്കുകയും ചെയ്തു. എന്നാൽ പോലീസിനെ വെട്ടിച്ച് ഗോൾഡ് കോസ്റ്റ് ഹൈവേ ലക്ഷ്യമാക്കി ഇയാൾ അമിതവേഗതയിൽ വാഹനം ഓടിച്ചുപോവുകയായിരുന്നു.
തുടർന്ന് പുലർച്ചെ ഒരു മണിയോടെ ഈ വാഹനം അതിർത്തി കടന്ന് ന്യൂ സൗത്ത് വെയ്ൽസിലേക്ക് പ്രവേശിച്ചതായി ക്വീൻസ്ലാൻഡ് പോലീസ് എൻ.എസ്.ഡബ്ല്യു പോലീസിന് വിവരം നൽകി. തൊട്ടുപിന്നാലെ ബനോറ പോയിന്റിൽ വെച്ച് വാഹനം കണ്ടെത്തുകയും നിർത്താൻ ആവശ്യപ്പെടുകയും ചെയ്തെങ്കിലും ഇയാൾ വിസമ്മതിച്ചതോടെ പോലീസ് പിന്തുടരുകയായിരുന്നു. വാഹനം തടയുന്നതിനായി സൗത്ത് മർവില്ലുംബയിൽ വെച്ച് പോലീസ് രണ്ട് തവണ റോഡ് സ്പൈക്കുകൾ (റോഡിൽ വിരിക്കുന്ന ആണി നിരകൾ) ഉപയോഗിച്ചെങ്കിലും, ടയർ തകർന്ന അവസ്ഥയിലും ഇയാൾ ഏകദേശം 20 കിലോമീറ്ററോളം മുന്നോട്ട് പോവുകയും പിന്നീട് റോഡരികിലെ താഴ്ചയിലേക്ക് ഇടിച്ചുകയറുകയുമായിരുന്നു.
അപകടസ്ഥലത്തെത്തിയ പോലീസ് സംഘം വാഹനത്തിന് ചുറ്റും സുരക്ഷാ വലയം തീർക്കുകയും ഇയാളുമായി സംസാരിക്കാൻ മധ്യസ്ഥരെ നിയോഗിക്കുകയും ചെയ്തു. എന്നാൽ ഉദ്യോഗസ്ഥർ വാഹനത്തിന് സമീപമെത്തിയപ്പോൾ ഡ്രൈവർ അബോധാവസ്ഥയിലാണെന്ന് കണ്ടെത്തുകയായിരുന്നു. പോലീസ് ഉടൻ തന്നെ സിപിആർ നൽകി രക്ഷപ്പെടുത്താൻ ശ്രമിച്ചെങ്കിലും സംഭവസ്ഥലത്തുതന്നെ ഇയാൾ മരണപ്പെട്ടു. വാഹനത്തിൽ നിന്ന് ഒരു തോക്ക് പോലീസ് കണ്ടെടുത്തിട്ടുണ്ട്. പോലീസിന്റെ പിന്തുടരലിനിടെ ജീവനഷ്ടം സംഭവിച്ച സാഹചര്യത്തിലാണ് ഉന്നതതല അന്വേഷണത്തിന് ഉത്തരവിട്ടിരിക്കുന്നത്.
