അബുദാബി: നാല് വർഷമായി തുടരുന്ന റഷ്യ-യുക്രെയ്ൻ യുദ്ധത്തിന് അന്ത്യം കുറിക്കാൻ ലക്ഷ്യമിട്ട് അമേരിക്കയുടെ മധ്യസ്ഥതയിൽ അബുദാബിയിൽ നടക്കുന്ന രണ്ടാം ഘട്ട ത്രികക്ഷി ചർച്ചകളിൽ നിർണ്ണായക പുരോഗതി. ചർച്ചയുടെ രണ്ടാം ദിവസമായ ഇന്ന് 300-ലധികം യുദ്ധത്തടവുകാരെ പരസ്പരം കൈമാറാൻ ഇരുരാജ്യങ്ങളും സമ്മതിച്ചു. ഓരോ വശത്തുനിന്നും 157 പേരെ വീതം ആകെ 314 തടവുകാരെയാണ് മോചിപ്പിക്കുക. അഞ്ച് മാസത്തിന് ശേഷമാണ് ഇരുരാജ്യങ്ങളും തമ്മിൽ ഇത്രയും വലിയൊരു തടവുപുള്ളി കൈമാറ്റത്തിന് തയ്യാറാകുന്നത് എന്നത് സമാധാന ശ്രമങ്ങൾക്ക് വലിയ പ്രതീക്ഷ നൽകുന്നുണ്ട്. അമേരിക്കൻ പ്രതിനിധി സ്റ്റീവ് വിറ്റ്കോഫ് ചർച്ചകൾ പുരോഗമനപരമാണെന്ന് വിശേഷിപ്പിച്ചെങ്കിലും, സ്ഥിരമായൊരു സമാധാന കരാറിലെത്താൻ ഇനിയും ഏറെ ദൂരം സഞ്ചരിക്കാനുണ്ടെന്നും അദ്ദേഹം കൂട്ടിച്ചേർത്തു.
യുക്രെയ്ൻ പ്രതിനിധി റുസ്തം ഉമറോവും റഷ്യൻ പ്രതിനിധി കിറിൽ ദിമിത്രീവും തമ്മിലുള്ള ചർച്ചകൾ ക്രിയാത്മകമാണെന്നാണ് റിപ്പോർട്ടുകൾ സൂചിപ്പിക്കുന്നത്. റഷ്യൻ നയതന്ത്രജ്ഞർ ചർച്ചകളിൽ പുരോഗതിയുണ്ടെന്ന് സമ്മതിക്കുമ്പോഴും, യൂറോപ്യൻ രാജ്യങ്ങൾ സമാധാന ശ്രമങ്ങളെ തടസ്സപ്പെടുത്താൻ ശ്രമിക്കുന്നതായി ആരോപിച്ചു. അതേസമയം, ചർച്ചകൾക്ക് തൊട്ടുമുമ്പ് യുക്രെയ്നിലെ ഊർജ്ജ നിലയങ്ങൾക്ക് നേരെ റഷ്യ നടത്തിയ മിസൈൽ ആക്രമണങ്ങൾ ചർച്ചകളിൽ കരിനിഴൽ വീഴ്ത്തിയിരുന്നു. ശൈത്യകാലം കടുക്കുന്ന സാഹചര്യത്തിൽ ജനജീവിതം ദുസ്സഹമാക്കുന്ന റഷ്യൻ നിലപാടിനെതിരെ യുക്രെയ്ൻ പ്രസിഡന്റ് വോളോഡിമിർ സെലെൻസ്കി രൂക്ഷമായി വിമർശിച്ചിരുന്നു. ഭൂപ്രദേശങ്ങൾ വിട്ടുകൊടുക്കുന്ന കാര്യത്തിൽ ഇരുരാജ്യങ്ങളും ഇപ്പോഴും വിട്ടുവീഴ്ചയ്ക്ക് തയ്യാറായിട്ടില്ലെങ്കിലും, തടവുകാരുടെ കൈമാറ്റം വലിയൊരു കാൽവെപ്പായി നയതന്ത്ര വിദഗ്ധർ വിലയിരുത്തുന്നു
