സിഡ്നി: അടുത്തയാഴ്ച ഓസ്ട്രേലിയ സന്ദർശിക്കാനിരിക്കുന്ന ഇസ്രായേൽ പ്രസിഡന്റ് ഐസക് ഹെർസോഗിന് നേരെ ഓൺലൈൻ വഴി വധഭീഷണി മുഴക്കിയ പത്തൊൻപതുകാരനെ ഓസ്ട്രേലിയൻ ഫെഡറൽ പോലീസ് (AFP) അറസ്റ്റ് ചെയ്തു. സിഡ്നിയിലെ നൈടൗൺ സ്വദേശിയായ ഡാർസി ടിന്നിംഗ് എന്ന യുവാവാണ് പിടിയിലായത്. കഴിഞ്ഞ ജനുവരിയിൽ സോഷ്യൽ മീഡിയ പ്ലാറ്റ്ഫോമായ ‘എക്സി’ലൂടെ (X) പ്രസിഡന്റിനെ വെടിവെച്ചു കൊല്ലുമെന്ന് ഇയാൾ ഭീഷണിപ്പെടുത്തിയതായി പോലീസ് പറഞ്ഞു. ഒരു വിദേശ രാഷ്ട്രത്തലവന് നേരെ വധഭീഷണി മുഴക്കിയെന്ന കുറ്റമാണ് ഇയാൾക്കെതിരെ ചുമത്തിയിരിക്കുന്നത്. കുറ്റം തെളിയിക്കപ്പെട്ടാൽ പത്തു വർഷം വരെ തടവുശിക്ഷ ലഭിക്കാവുന്ന വകുപ്പുകളാണിത്.
ബുധനാഴ്ച സിഡ്നിയിലെ വസതിയിൽ നടത്തിയ പരിശോധനയ്ക്ക് ശേഷമാണ് യുവാവിനെ പോലീസ് കസ്റ്റഡിയിലെടുത്തത്. ഇയാളുടെ പക്കൽ നിന്ന് മൊബൈൽ ഫോണും മയക്കുമരുന്ന് ഉപയോഗിക്കാനുള്ള ഉപകരണങ്ങളും കണ്ടെടുത്തു. വ്യാഴാഴ്ച സിഡ്നി കോടതിയിൽ ഹാജരാക്കിയ യുവാവിന് ജാമ്യം നിഷേധിച്ചു. സമൂഹത്തിൽ നിലനിൽക്കുന്ന രാഷ്ട്രീയ സംഘർഷാവസ്ഥയും ഭീഷണിയുടെ ഗൗരവവും പരിഗണിച്ചാണ് കോടതി നടപടി. അതേസമയം, ഹെർസോഗിന്റെ സന്ദർശനം റദ്ദാക്കണമെന്നും അദ്ദേഹത്തെ യുദ്ധക്കുറ്റങ്ങളുടെ പേരിൽ അറസ്റ്റ് ചെയ്യണമെന്നും ആവശ്യപ്പെട്ട് വിവിധ മനുഷ്യാവകാശ സംഘടനകളും പ്രോ-പാലസ്തീൻ ഗ്രൂപ്പുകളും രംഗത്തെത്തിയിട്ടുണ്ട്. എന്നാൽ, ബോണ്ടി ബീച്ചിലെ ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലി അർപ്പിക്കാൻ എത്തുന്ന പ്രസിഡന്റിനെ രാജ്യം ഔദ്യോഗികമായി സ്വാഗതം ചെയ്യുമെന്ന് വിദേശകാര്യ മന്ത്രി പെന്നി വോംഗ് വ്യക്തമാക്കി.
