വിദേശത്തുനിന്ന് ആഡംബര കാറുകൾ നിയമവിരുദ്ധമായി ഇന്ത്യയിലേക്ക് കടത്തുന്ന വൻ സംഘത്തെ ഡിപ്പാർട്ട്മെന്റ് ഓഫ് റവന്യൂ ഇന്റലിജൻസ് (DRI) ‘ഓപ്പറേഷൻ നംഖോർ’ (Operation Numkhor) എന്ന രഹസ്യനീക്കത്തിലൂടെ പിടികൂടി. കോടിക്കണക്കിന് രൂപയുടെ നികുതി വെട്ടിപ്പ് നടത്തിയാണ് ഈ സംഘം പ്രവർത്തിച്ചിരുന്നത്.ആഡംബര കാറുകൾ അനധികൃതമായി കടത്തിയതുമായി ബന്ധപ്പെട്ട് പ്രധാന പ്രതികളെ കസ്റ്റംസ് അറസ്റ്റ് ചെയ്തു.
വിദേശ രാജ്യങ്ങളിൽ നിന്ന് ഇന്ത്യയിലേക്ക് കാറുകൾ ഇറക്കുമതി ചെയ്യുമ്പോൾ നൽകേണ്ട ഉയർന്ന ഇറക്കുമതി തീരുവ ഒഴിവാക്കാനായി നയതന്ത്ര ഉദ്യോഗസ്ഥരുടെ പേരും ആനുകൂല്യങ്ങളും സംഘം ദുരുപയോഗം ചെയ്തു. നയതന്ത്ര ഉദ്യോഗസ്ഥർക്ക് ലഭിക്കുന്ന നികുതി ഇളവുകൾ ഉപയോഗിച്ച് കാറുകൾ എത്തിച്ച ശേഷം അവ മറിച്ചുവിൽക്കുകയായിരുന്നു ഇവരുടെ രീതി. ഏകദേശം 25 കോടിയോളം രൂപയുടെ നികുതി വെട്ടിപ്പാണ് പ്രാഥമികമായി കണ്ടെത്തിയിരിക്കുന്നത്.
ടൊയോട്ട ലാൻഡ് ക്രൂസർ ഉൾപ്പെടെയുള്ള വിലകൂടിയ നിരവധി ആഡംബര വാഹനങ്ങൾ ഉദ്യോഗസ്ഥർ പിടിച്ചെടുത്തു.ഡൽഹി, മുംബൈ, ഗുജറാത്ത് തുടങ്ങി രാജ്യത്തിന്റെ വിവിധ ഭാഗങ്ങളിൽ ഡി.ആർ.ഐ റെയ്ഡുകൾ നടത്തി. വിദേശത്തുനിന്ന് കാറുകൾ എത്തിക്കുന്നതിനായി വ്യാജ രേഖകൾ ചമച്ചതായും അന്വേഷണത്തിൽ കണ്ടെത്തിയിട്ടുണ്ട്.
