അഹമ്മദാബാദ്: ടി20 ലോകകപ്പിൽ കിരീടം നിലനിർത്തി ഇന്ത്യ. അഹമ്മദാബാദിൽ നടന്ന ആവേശകരമായ ഫൈനൽ പോരാട്ടത്തിൽ ന്യൂസിലാൻഡിനെ 96 റൺസിന് തകർത്തുവിട്ടാണ് ഇന്ത്യ ചാമ്പ്യൻപട്ടം അലങ്കരിച്ചത്.
ഇന്ത്യ ഉയർത്തിയ കൂറ്റൻ വിജയലക്ഷ്യത്തിന് മുന്നിൽ കിവീസ് പട അടിയറവ് പറയുകയായിരുന്നു.ആദ്യം ബാറ്റ് ചെയ്ത ഇന്ത്യ എതിരാളികൾക്ക് മുന്നിൽ 256 റൺസെന്ന വമ്പൻ വിജയലക്ഷ്യമാണ് ഉയർത്തിയത്. മറുപടി ബാറ്റിംഗിനിറങ്ങിയ ന്യൂസിലാൻഡിന് തുടക്കം മുതൽ തന്നെ ഇന്ത്യൻ ബൗളർമാർക്കുമുന്നിൽ പിടിച്ചുനിൽക്കാനായില്ല. നിശ്ചിത ഓവറുകൾ പൂർത്തിയാകും മുൻപേ 19 ഓവറിൽ 159 റൺസിന് കിവീസ് എല്ലാവരും പുറത്തായി. 52 റൺസ് നേടിയ ടിം സെയ്ഫെർട്ടാണ് അവരുടെ ടോപ് സ്കോറർ.
ഇന്ത്യൻ ബൗളിങ് നിരയുടെ കൃത്യതയാർന്ന പ്രകടനമാണ് വിജയത്തിന് അടിത്തറ പാകിയത്. പേസർ ജസ്പ്രീത് ബുംറ നാല് വിക്കറ്റുകൾ വീഴ്ത്തി എതിരാളികളുടെ നടുവൊടിച്ചപ്പോൾ, അക്സർ പട്ടേൽ മൂന്ന് വിക്കറ്റുകൾ നേടി കിവീസിനെ വരിഞ്ഞു മുറുക്കി. ഫൈനൽ മത്സരത്തിലുടനീളം ആധിപത്യം പുലർത്തിയ ഇന്ത്യ അർഹിച്ച വിജയമാണ് സ്വന്തമാക്കിയത്.
