കോഴിക്കോട്: കോഴിക്കോട് ജില്ലാ കോടതിയിൽ ബോംബ് ഭീഷണിയെ തുടർന്ന് പരിഭ്രാന്തി. ചൊവ്വാഴ്ച ഉച്ചയോടെയാണ് കോടതി വളപ്പിൽ ബോംബ് വെച്ചിട്ടുണ്ടെന്ന സന്ദേശം അധികൃതർക്ക് ലഭിച്ചത്. ഇതേത്തുടർന്ന് കോടതി നടപടികൾ താത്കാലികമായി നിർത്തിവെക്കുകയും ആളുകളെ ഒഴിപ്പിക്കുകയും ചെയ്തു.
ഭീഷണി സന്ദേശം ലഭിച്ച ഉടൻ തന്നെ പൊലീസും ബോംബ് സ്ക്വാഡും ഡോഗ് സ്ക്വാഡും സ്ഥലത്തെത്തി വിശദമായ പരിശോധന നടത്തി. കോടതി കെട്ടിടത്തിന്റെ വിവിധ ഭാഗങ്ങൾ, പരിസരങ്ങൾ, വാഹനങ്ങൾ എന്നിവ കർശനമായി പരിശോധിച്ചു.മണിക്കൂറുകൾ നീണ്ട പരിശോധനയ്ക്കൊടുവിൽ സംശയാസ്പദമായ ഒന്നും കണ്ടെത്താനായില്ല. ഇതോടെ സന്ദേശം വ്യാജമാണെന്ന് പൊലീസ് സ്ഥിരീകരിച്ചു.
വ്യാജ സന്ദേശത്തിന്റെ ഉറവിടം കണ്ടെത്താനായി സൈബർ സെല്ലിന്റെ സഹായത്തോടെ പൊലീസ് അന്വേഷണം ആരംഭിച്ചിട്ടുണ്ട്. സന്ദേശം ഇമെയിൽ വഴിയാണോ അതോ ഫോൺ വഴിയാണോ എത്തിയത് എന്ന കാര്യത്തിൽ കൂടുതൽ അന്വേഷണം നടന്നുവരികയാണ്.
